Kthesë e papritur e Le Pen, i kundërvihet Trumpit për heqjen e fondeve ndaj Ukrainës

Marine Le Pen e ka dënuar pezullimin e menjëhershëm të ndihmës nga Donald Trump për Ukrainën, në një kthesë të papritur të retorikës së saj politike brenda spektrit francez.

“Është shumë mizore ndaj ushtarëve ukrainas që po mbrojnë atdhetarisht vendin e tyre”, theksoi kryetarja e Rassemblement Nacional, partisë së ekstremit të djathtë në Francë. Sipas politikanes, presidenti amerikan duhet t’u japë autoriteteve në Kiev “një kohë të arsyeshme” përpara se të tërheqë mbështetjen.

“Askush nuk mund t’i detyrojë Shtetet e Bashkuara të ruajnë mbështetjen nëse nuk e duan më, por Ukrainës nuk i është dhënë një kohë e arsyeshme për t’u rikthyer”, tha Marine Le Pen në një intervistë me Le Figaro të martën, duke komentuar vendimin e Donald Trump për të pezulluar ndihmën për Ukrainën.

Ajo vuri në dukje se “është shumë mizore ndaj ushtarëve ukrainas që po mbrojnë patriotikisht vendin e tyre”. “Brutaliteti i këtij vendimi është i dënueshëm”, vuri në dukje politikanja francez.

Marine Le Pen kundërshton dërgimin e trupave franceze në Ukrainë
Marine Le Pen ka kundërshtuar më parë dërgimin e trupave franceze në Ukrainë, duke theksuar se ideja e trupave të përbashkëta evropiane është “iluzore” dhe se Franca, duke ndihmuar Ukrainën, “duhet të ketë parasysh interesat e saj kombëtare”. Ajo kundërshtoi gjithashtu ndarjen e një “ombrellë bërthamore” me vendet e tjera evropiane.

“Le Figaro” kujton se politikania u kritikua për mbështetjen e politikës së Rusisë pas aneksimit të Krimesë në vitin 2014. Në vitin 2017, ajo vizitoi Kremlinin dhe u takua me Vladimir Putin, të cilin e cilësoi si patriot.

Sherri i Donald Trump me Volodymyr Zelensky në Shtëpinë e Bardhë
Presidenti ukrainas Volodymyr Zelensky foli në Shtëpinë e Bardhë të premten me Presidentin e SHBA-ve, Donald Trump dhe zëvendësin e tij, JD Vance, për marrëveshjen për burimet natyrore të Ukrainës dhe perspektivat për t’i dhënë fund luftës.

Takimi përfundoi me një debat të transmetuar drejtpërdrejt nga mediat, gjatë të cilit presidenti dhe nënpresidenti amerikan ngritën zërin dhe e qortuan liderin ukrainas, duke e akuzuar atë për mosrespektim dhe mosmirënjohje.