Kuba anulon festimet për 1 maj sepse nuk ka karburant, 1 litër vaj kap shifrën e 30 dollarëve

Qeveria komuniste e Kubës ka anuluar paradën tradicionale të 1 majit, për shkak të mungesës akute të karburantit.

Çdo vit, qindra mijëra njerëz hyjnë me autobusë nga i gjithë ishulli për të mbushur Sheshin e Revolucionit të Havanës në Ditën Ndërkombëtare të Punëtorëve.

Është hera e parë që nga revolucioni i vitit 1959 që festimet anulohen për arsye ekonomike.

Javët e fundit janë krijuar radhë të gjata në pompat e benzinës, ku shoferët shpesh presin me ditë të tëra.

Në fillim të këtij muaji, presidenti Miguel Diaz-Canel tha se Kuba po merrte vetëm dy të tretat e karburantit që i nevojitet, duke shtuar se furnitorët nuk po përmbushnin detyrimet kontraktuale.

Ndërsa Kuba ka akses në naftë të papërpunuar me cilësi të ulët, ishullit të sanksionuar nga SHBA i mungojnë lehtësitë për ta përpunuar atë.

Dërgesat e naftës së papërpunuar me cilësi më të lartë nga Venezuela, ofruesi më i madh i karburantit në Kubë, kanë rënë me 50% vitet e fundit.

Analistët thonë se Venezuela po përjeton vetë probleme të rënda dhe e ka gjithnjë e më të vështirë të subvencionojë aleatin e saj socialist.

Mungesat kanë shtuar presionet e përditshme me të cilat përballen kubanët. Sipas gazetës spanjolle El Pais, një pagë tipike mujore është 150-200 dollarë, ndërsa një litër vaj gatimi kushton 30 dollarë.

Qeveria këmbëngul se modeli i saj socialist i drejtuar nga shteti është më i miri për vendin dhe fajëson për problemet sanksionet e gjata të SHBA.