Kryeministri i Kosovës, Albin Kurti, ka gjetur fjalë të mira për Marrëveshjen e Washingtonit të nënshkruar nga ish-kryeministri Avdullah Hoti më 4 shtator 2020. Në një intervistë për gazetën spanjolle “Elmundo”, Kurti ka thënë se ajo marrëveshje e arritur gjatë administratës Trump I ishte për të promovuar stabilitetin, shkruan Gazeta Express.
Kështu ka thënë Kurti kur është përgjigjur për atë se si e percepton Kosova ardhjen e Trump në Shtëpi të bardhë dhe për atë se si kjo mund të ndikojë në përkrahjen e Shteteve të Bashkuara ndaj Kosovës.
Lideri i VV-së thotë se s’beson që do të ketë ndonjë ndryshim qëndrimi të SHBA-së ndaj Kosovës.
“Kosova mban një marrëdhënie të fortë bilaterale me Shtetet e Bashkuara, e bazuar në përkushtimin e tyre të vazhdueshëm ndaj sovranitetit tonë dhe integrimit në BE dhe NATO. Gjatë mandatit të Trump, u prioritizuan marrëveshjet ekonomike ndërmjet Kosovës dhe Serbisë për të promovuar stabilitetin, ndërsa administrata Biden ka forcuar institucionet demokratike në Ballkan. Megjithëse këto dallime reflektojnë ndryshime në qasje, nuk besoj se Shtetet e Bashkuara do të ndryshojnë qëndrimin e tyre ndaj Kosovës; ne punojmë ngushtë me Uashingtonin”,ka thënë Kurti.
Kurti pas rikthimit në pushtet, s’ka bërë asnjë hap për implementimin e Marrëveshjes së Washingtonit. Madje në korrik të vitit 2021, kishte thënë se efekti i parë i asaj marrëveshje ishte që iu hap dera e Shtëpisë së Bardhë presidentit të Serbisë, Aleksander Vucic.
“Efekti i menjëhershëm nuk kishte qenë ajo që ndodhi pas nënshkrimit, ajo që i parapriu nënshkrimit, e kjo është hapja e portës së Shtëpisë së Bardhë për presidentin e Serbisë”, kishte deklaruar Kurti.
