Kryeministri në detyrë, Albin Kurti, ka kujtuar 27 prillin e vitit 1999 dhe masakrën e Mejës së Gjakovës ku u vranë e u zhdukën 376 persona.
Ai përmes një postimi në Facebook ka thënë se përvjetori i Masakrës së Mejës dhe Dita për Persona të Zhdukur, e shpallur në nderim të viktimave të masakrës së Mejës dhe gjithë të zhdukurve si pasojë e Luftës në Kosovë, tregojnë se ka edhe shumë plagë të hapura.
“Aktualisht, janë edhe 1641 persona të zhdukur. Janë familjet e 1641 personave që vazhdojnë të jetojnë në ankthin e pritjes, 1641 familje vuajtja e të cilave është stërzgjatë për më shumë se dy dekada. Fëmijë, tani të rritur bashkë me pritjen për një përgjigje. Pleq që nuk kanë njohuri për fatin dhe vendndodhjen e trashëgimtarëve të tyre. Thuhet se koha shëron plagë, por kjo thënie dështon te familjet e të zhdukurve. Koha vetëm sa vjen e thellon plagët, venit shpresën dhe rëndon dhimbjen për këta familjarë”, ka shkruar ai.
Ai thotë se nuk është e mundshme të ndërtohet e ardhmja, pa u mbyllur si duhet e kaluara.
“Kemi obligim që të bëjmë gjithë sa mundemi që t’i prejmë rrugën kësaj drejtësie të munguar, duke e bërë çështjen e të zhdukurve si çështje të parë në dialogun e ardhshëm Kosovë – Serbi. Nuk ka amnisti – por vetëm drejtësi. Sepse… të gjithëve na mungojnë”, ka shkruar ai.
Ndërkohë që në ndërtesën e Qeverisë, sonte është paraqitur shifra e personave të zhdukur me mesazhin “Të gjithëve na mungojnë”.
