Kush është Adem Hoxha që u takua me të gjithë liderët e Kosovës dhe Serbisë dhe kush kërkoi arrestimin e tij?

Të dielën Serbia organizoi zgjedhjet e përgjithshe parlamentare. Këto zgjedhje ishin organizuar edhe në Kosovë, ku shumë qytetarë serbë kanë votuar edhe pse kjo është jashtëkushtetuese, pasi një shtet që nuk e njeh Kosovën organizoi zgjedhjet për të votuar komuniteti i tyre.

Megjithatë, kishte edhe reagime të shumta edhe ndaj organizatorëve të tyre.

Njëri prej organizatorëve ishte edhe Adem Hoxha dhe vëllai i tij Rexhepi, shkruan gazeta “Bota sot”.

Ademi tashmë i njohur për shumë kë në Kosovë, ku kishte takime pothuajse me të gjithë liderët politik në Kosovë, shihet në fotografi mjaft i buzëqeshur edhe me liderët serbë.

Mirëpo, ndaj tij kishte reaguar kryetari i “komunës së pavarur të Gorës”, Safet Kushi, ku kishte kërkuar nga autoritetet e sigurisë që sa më parë të ndërmarrin masa ndaj Rexhep Hoxhës dhe vëllait të tij Ademit për shkak të organizimit të zgjedhjeve serbe në Kosovë.

Me këtë rast ai u bëri thirrje publike OSBE-ë UNMIK-ut dhe BE-së në Kosovë, Policisë në Dragash dhe qytetarëve të Gorës të mos bien pre e mashtrimeve me zgjedhje.

“Grupi kriminal i drejtuar nga Rexhep Hoxha dhe vëllai i tij Adem Hoxha, përndryshe koordinatorë të mirënjohur të krimeve nga kohën e regjimit të Millosheviçit, po organizojnë zgjedhje në OJQ Autoriteti i përkohshëm, Vraniç në Gorës. Rexhep Hoxha në mënyrë të rreme pretendon të jetë i dërguar posaçëm i Aleksandër Vuçiq dhe BIA-s Serbe. Është vetëm çështje mashtrimi dhe abuzimi për përfitime personale. Ata janë në bashkëpunim me organizatën mafioze të udhëhequr nga Milan Radoiçiq, për të cilin është lëshuar dhe urdhër-arresti në Kosovë. Bëhet fjalë për pastrim parash dhe mashtrim”, kishte deklaruar ndër tjera Kushi.