Kush është polici që e hoqi dhe e hodhi në tokë flamurin shqiptar!?

Edhe policë, edhe huliganë! Në rrjetet sociale po qarkullon një video e realizuar mbrëmë në Kumanovë, e ku shihet një person – për të cilin thuhet se është polic, që heq flamurin shqiptar nga shtylla dhe e hedh në tokë, ndërsa është ngjitur mbi furgonin e policisë, për të arritur flamurin lart, shkruan gazeta KOHA.

Video është publikuar nga profili “MK Pirej”, ndërsa është shpërndarë edhe nga profili “Makedonski Patrioti”, një faqe ku shqiptarët fyhen për çdo ditë, ndërsa mbështetet VMRO-DPMNE.

“I lumtë policit. Mjaftë kemi heshtur nga 2011 e këndej. Do ti heqim flamujt edhe në Tetovë edhe në Gostivar. Maqedonia e maqedonasve”, është shkrimi që e shoqëron videon ku polici i hipur mbi furgonin e policisë heq flamurin shqiptar dhe e hedh në tokë.

MPB e Pançe Toshkovskit, edhe pse video u bë virale, vazhdon të heshtë për këtë skandal ku, persona zyrtar, keqpërdorin detyrën zyrtare dhe nxisin urrejtjen ndëretnike.

Në ndërkohë, asnjë informatë nuk ka nëse policia e Toshkovskit ka identifikuar huliganët maqedonas të vetquajtur “Patriotët e Maqedonisë”, e që thonë se janë nga Kumanova, dogjën mbrëmë flamurin kombëtar shqiptar.

Nga ana tjetër, në 8 ka arritur numri i të arrestuarve shqiptarë, katër prej të cilëve ngarkohen me vepër penale “nxitje të urrejtjes dhe mosdurimit ndëretnik”, pasi grisën flamuron shtetëror të Maqedonisë.

Tre, siç tha sot ministri i Policisë, Pançe Toshkovski, janë 18, 19 dhe 20 vjeç, ndërsa njëri është i mitur, konkretisht nën moshën madhore. (koha.mk)