Pas më shumë se tri javësh në arrati, Policia ka arritur që të identifikojë dhe të lokalizojë vendndodhjen e personit që dyshohet se kreu vjedhjen e rëndë në shtëpinë e shehut të Teqesë së Madhe në Gjakovë. I dyshuari tashmë është vënë në pranga dhe ka përfunduar në ndalim policor, raporton Gazeta Sinjali.
Sinjali mëson ekskluzivisht nga burimet brenda Prokurorisë se bëhet fjalë për 48-vjeçarin, Xhevat Thaçi.
Thaçi dyshohet se ka depërtuar brenda shtëpisë së shehut dhe ka arritur që të vjedh para të gatshme në vlerë të rreth 200 mijë eurove të cilat ndodheshin brenda dy kasafortave.
E përpos këtyre, ai dyshohet se vodhi edhe një sasi të stolive të arit.
I dyshuari që atëherë po shijonte lirinë nga arratia, teksa njësitë policore kishin marrë veprimet hetimore për të zbardhur detajet e rastit dhe identitetin e tij.
“Sektori Rajonal i Hetimeve në kuadër të Drejtorisë Rajonale të Policisë në Gjakovë pas një hetimi të gjerë dhe intensiv, ku janë shikuar qindra orë video incizime (nga lokacione të ndryshme) dhe janë analizuar shumë prova është arritur të identifikohet dhe arrestohet i dyshuari: Xh.TH., i lindur në vitin 1975, shtetas i Republikës së Kosovës”, thuhet në njoftimin e lëshuar nga Policia mëngjesin e sotëm.
Policia në koordinim me Prokurorinë ka kryer bastisje në objektet e banimit të të dyshuarit, ku gjatë kontrollit janë gjetur dhe sekuestruar një pistoletë me një karikator, gjashtë fishekë, disa stoli ari, rroba, telefona dhe gjëra tjera të cilat dyshohet se janë përdorur me rastin e kryerjes së vjedhjes.
Sinjali mëson se Thaçi është emër i njohur për organet e drejtësisë, pasi i njëjti dyshohet se është përfshirë në 34 vepra tjera penale “Vjedhje”, “Vjedhje e rëndë” dhe “Grabitje”.
Pas arrestimit, 48-vjeçari është shoqëruar në stacion policor, ku është intervistuar nga organet e hetuesisë lidhur me rastin.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policornën dyshimet për kryerjen e veprave penale “Vjedhje e rëndë” dhe “Mbajtje në pronësi, kontroll ose posedim të paautorizuar të armës”.
Brenda afatit ligjor, Prokuroria pritet të parashtrojë kërkesë për caktimin e masës së sigurisë ndaj tij.
Nga objekti fetar kanë reaguar në ditën që ka ndodhur rasti, ku thuhej se shuma prej rreth 200 mijë eurosh ishin kursime disavjeçare të shehut, e të cilat ishin destinuar për investimim dhe rindërtimin përfundimtar të objektit të Teqes së Madhe në Marash-Hisar të Prizrenit.
