Larg qytetërimit dhe njerëzve, burri që ka 40 vite që jeton si shpellar

Ken Smith është një burrë anglez që prej 40 vitesh jeton në pyll, larg qytetërimit.

74-vjeçari jeton i vetëm në një kasolle, që kur një grup djemsh e rrahu gati për vdekje. Smith kaloi 23 ditë në koma dhe mjekët nuk i dhanë shpresë se do të kthehej si më parë.

“Thonin se nuk do të shërohesha kurrë, thonin se nuk do të flisja më, se nuk do të ecja më, por i bëra të gjitha. Pikërisht atëherë vendosa që do të jetoja vetëm siç doja vetë”, tregon Smith për BBC.

“Mendova se si do të ishte thjesht të lëvizja, të udhëtoja nga një vend në tjetrin. Thjesht lëvizja pa ndonjë qëllim se ku do të shkoja. Ecja në çdo kodër dhe në çdo cep të vendit, për të gjetur vende ku nuk kishte banesa të ndërtuara. Derisa erdha në pyllin tim, ku ndërtova kasollen time dhe jetoj i lumtur”, shtoi Smith.

Anglezi ushqehet vetëm me perimet e frutat që rrit vetë dhe peshkun që kap nga liqeni aty pranë.

“Nëse mësoni të peshkoni, nuk keni më nevojë për asgjë tjetër. Atëherë do të jeni me të vërtetë të pavarur”, thekson Smith.