Analisti Blerim Latifi, duke komentuar protestën e sotme të veteranëve, ka thënë se kjo protestë është aksion politik i opozitës që sipas tij po zhvillohet sipas metodave të dikurshme të Kurtit.
“Fatkeqësisht kjo nuk është protestë e veteranëve, por aksion politik i opozitës, i zhvilluar sipas metodave të dikurshme të Kurtit: protesto jashtë Kuvendit dhe blloko punën e Kuvendit nga brenda”, shkroi ai në Facebook.
Tutje, Latifi ka shkruar se, një veteran që proteston jashtë Kuvendit për pagën minimale, nuk do të lejonte që zëri i tij të përfaqësohej brenda në Kuvend nga, siç i quan ai, profiterët milionerë të luftës e pasluftës.
Kujtojmë se po vazhdon protesta e veteranëve në oborrin e Kuvendit të Kosovës ku po kërkohet përfshirja e tyre në ligjin për pagë minimale.
Postimi i plotë:
Fatkeqësisht kjo nuk është protestë e veteranëve, por aksion politik i opozitës, i zhvilluar sipas metodave të dikurshme të Kurtit: protesto jashtë Kuvendit dhe blloko punën e Kuvendit nga brenda!
Një veteran që proteston jashtë Kuvendit për pagën minimale ( të cilën duhet ta ketë patjetër), nuk do të lejonte që zëri i tij të përfaqësohej brenda në Kuvend nga profiterët milionerë të luftës e pasluftës.
Sot ne po shohim faktikisht një ofendim të dyfishtë të veteranëve: nga pushteti që i ka sjellë në këtë situatë me protestu për një pagë minimale, e cila realisht është edhe më keq se minimalja e ekzistencës, dhe nga opozita, e cila hapur po bën lojën e përdorimit të veteranëve për qëllimin e saj të ardhjes në pushtet.
