LDK doli e para me vota, kështu reagon Lumir Abdixhiku

Në zgjedhjet lokale të mbajtura më 17 tetor, Lidhja Demokratike e Kosovës doli e para për nga numri i votave me gjithsejtë 170 mijë e 177 vota.

Kryetari i LDK-së, Lumir Abdixhiku, përmes një postimi në llogarinë e tij në Facebook, ka thënë se “rikthimi ynë, si parti e parë në zgjedhje lokale, është përmbushje e plotë për secilin nga ne”.

“Pas përfundimit të procesit të numërimit të të gjitha votave, të rregullta, të mërgatës e me kusht, i falënderoj të 170,177 votuesit e LDK-së, që me besimin dhe mbështetjen e tyre, vendosën Lidhjen Demokratike të Kosovës si partinë e parë – me më së shumti vota – në zgjedhjet e 17 tetorit”, ka shkruar Abdixhiku.

“Por, mbi të gjitha, është rikujtim se angazhimi ynë i vërtetë dhe i drejtë merr gjithherë mbështetje qytetare. Këtë besim e këtë rikthim duhet ta kujdestarojmë me plot përgjegjësi deri në vlerësimin tjetër”, shtoi ai.

Po ashtu, Abdixhiku ka thënë se puna e tyre vazhdon edhe më tej në raundin e dytë të zgjedhjeve lokale.

Ndërkaq, rezultatet përfundimtare për zgjedhjet lokale të 17 tetorit pritet të shpallen të enjten e 28 tetorit.

Kështu ka thënë për Albanian Post, Zëdhënësi i Komisionit Qendror të Zgjedhjeve, Valmir Elezi, teksa ka shtuar se publikimi i tyre do të bëhet rreth orës 10:00.

“Mund t’ua konfirmoj se rezultatet përfundimtare të raundit të parë të zgjedhjeve lokale për Kryetarë të Komunave do të shpallen të enjten, në orën 10:00”, është shprehur Elezi.

Kurse, raundi i dytë i komunave që kanë shkuar në balotazh zhvillohet më 14 nëntor.