Në Shqipëri, prej tetorit të vitit të shkuar qytetarët po përballen me rritje çmimesh, përfshirë bukën dhe karburantin. Autoriteti i Konkurrencës, për të dy këto shqetësime ka nisur hetime, por paraprakisht institucioni ka deklaruar se ka për detyrë të mbrojë konkurrencën, e jo të ulë çmimet.

Justifikim të ngjashëm ka përdorur edhe qeveria përmes kryeministrit Rama, që ndonëse pranon se vendi gjendet në gati “gjendje lufte”, refuzon të ndërhyjë ndaj rritjes së çmimeve nën argumentin se vlerën e përcakton tregu dhe qeveria nuk mund të ndërhyjë.

Po sa e vërtetë është kjo?

Në ligjin “Për përpunimin, transportimin dhe tregtimin e naftës, të gazit dhe nënprodukteve të tyre”, në nenin 7 thuhet:

“Këshilli i Ministrave ka kompetence liberalizimin e çmimeve të shitjes me pakicë të nënprodukteve të naftës dhe të gazit. Në situata të veçanta tregu, Këshilli i Ministrave mund të vendosë kufizime të përkohshme (çmime tavan apo dysheme) për çmimet e shitjes me pakicë të nënprodukteve të naftës e të gazit.”

Për studiuesin e ekonomisë Selim Blliku, mosndërhyrja e qeverisë për përcaktimin e një çmimi maksimal për tregtimin e karburanteve e ka një arsye.

Ndërkohë që qeveria ka marrë rolin e vëzhguesit, çmimet e naftës, benzinës e gazit në vend ndryshojnë nga dita në ditë, e në raste nga ora në orë. Ekspertët kanë theksuar se për të shmangur këto luhatje me nuanca abuzimi, ndihmon vendosja çmimet tavan.

Vendosja e çmimit tavan është aplikuar tashmë në vendet e Rajonit si Kosova e Serbia, Bashkimin Europian si dhe Shtetet e Bashkuara të Amerikës.

Lexo më shumë