Mesha solemne dhe riti i Lumnimit të dy martirëve të rinj të kishës katolike në Shqipëri dhe Kosovë, Don Gjon Gazulli dhe Atë Luigj Paliq, u mbajt sot në Katedralen e Shën Shtjefnit në qytetin e Shkodrës në prani të Ipeshkvijve të Shqipërisë, Kosovës, Malit të Zi, Kroacisë dhe Italisë si dhe një numri të madh të besimtarëve, brenda dhe jashtë katedrales.
Riti i Lumnimit të Don Gazullit dhe Atë Paliq u kryesua nga i dërguari i posaçëm i Atit të Shenjtë, Papa Françeskut, Eminenca e Tij Kardinal Marcello Semeraro, Prefekt i Dikasterit për Çështjet e Shenjtërve.
Arqipeshkvi Shkodër-Pultit, Imzot Angelo Massafra tha gjatë fjalës së tij se, Don Gjon Gazulli dhe At Luigj Paliq kanë dëshmuar me jetën e tyre se vazhdojnë t’i japin lavdi Hyut.
“Sot, nga Shqipëria e vogël, në mbarë kishën dhe para mbarë botës, Krishti është dëshmuar edhe një herë me forcën e martirizimit. Martirë të rinj të Lumë u bashkuan me 38 të Lumët e vitit 2016, ndërsa mbetet gjithnjë e hapur lista e burrave dhe grave që edhe sot, me jetën e tyre vazhdojnë t’i japin lavdi Hyut duke ushqyer fenë dhe guximin e popullit të krishterë”.
Lumnimi i martirëve Don Gjon Gazulli nga Shqipëria dhe At Luigj Paliq nga Kosova e çon në 40 numrin e martirëve të kishës, shpallur të Lumë nga Ati i Shenjtë. Tetë vite më parë, më 5 nëntor të vitit 2016, po në Shkodër, u shpallën të Lumë 38 martirët e parë të kishës në Shqipëri, të cilët i qëndruan përndjekjes nga regjimi komunist i kohës, duke u martirizuar në mbrojtje të besimit të tyre fetar.
Don Gjon Gazulli u lind në Dajç të Zadrimës në vitin 1893. Studioi në Itali, Francë dhe Austri dhe u shugurua meshtar në vitin 1919. Si kundërshtar i vendosur i qeverisë së Mbretit Zog, ai kundërshtoi qëndrimin që mbahej ndaj Dukagjinit, Pukës dhe Mirditës. Për këtë arrestohet dhe dënohet me varje në vitin 1926.
Ndërsa Atë Luigj Paliq u lind në Janjevë të Kosovës në vitin 1879. Studioi në Itali dhe u shugurua meshtar në vitin 1901. Shërbeu në Kosovë, në famullinë e Pejës, të Gllogjanit si dhe në Gjakovë dhe Arqipeshkvinë e Shkodrës. U martirizua në Janosh, afër Gjakovës, në mars 1913, pasi nuk pranoi të bëhej prift ortodoks.
Gjatë ritit të Lumnimit, arqipeshkvi i Shkodër-Pultit, imzot Angelo Massafra i kërkoi Prefektit të Dikasterit për Çështjet e Shenjtërve Kardinal Marcello Semeraro që t’i përcjellë Papa Françeskut mirënjohjen për vlerësimin që ai i ka bërë martirëve të kishës dhe popullit shqiptar.
“ Duke falenderuar Hyun, i cili nëpërmjet martirëve tanë na dha shembullin e qëndrimit të fortë dhe deri në vdekje, ju lutem t’i paraqisni Shenjtërisë së Tij, Papa Françeskut, mirënjohjen tonë për dhuratën që t’i numërojë ndër të Lumët shërbëtorin e Hyut, Luigj Paliq dhe shërbëtorin e Hyut, Gjon Gazullin”./VOA
