Lushtaku përdor gjuhë të rëndë në tubimin e PDK-së në Skenderaj

Kryetari i Komunës së Skenderajt, Sami Lushtaku, ka përdorur gjuhë të rëndë ndaj anëtarëve të Lëvizjes Vetëvendosje, gjatë një tubimi elektoral të Partisë Demokratike të Kosovës të mbajtur të mërkurën në palestrën e sporteve “Ilaz Kodra” në Skenderaj.

Lushtaku shprehu mbështetje për kandidatin e PDK-së për kryeministër, Bedri Hamza, duke thënë se nuk ka dëshirë që ai të jetë “kopje e kryeministrave të tjerë” që kanë qeverisur në Kosovë. Megjithatë, përkundër se theksoi se PDK-ja është kundër sharjeve dhe fyerjve, ai nuk hezitoi të përdorë etiketime ndaj kundërshtarëve politikë.

“E di se na kanë sharë kapak, megjithatë jemi përpjekur të jemi më të kujdesshëm. Unë më pak, por PDK-ja më shumë. Ne nuk flasim për të tjerët, por do të kemi kujdes edhe ndaj zagarëve, edhe ndaj zagaricave… Unë mendoj se duhet t’i themi stop përçarjes sepse kjo nuk ka asnjë kuptim”, deklaroi Lushtaku para simpatizantëve në Skenderaj.

Ndryshe, kreu i Skenderajt nxiti reagime për shkak të një deklarate ndaj ish-deputetes së LVV-së, Adriana Matoshi, nivelin e së cilës e krahasoi me atë të punonjësve të shtëpive publike. Reagimi i Lushtakut erdhi në kuadër të kundërpërgjigjes ndaj ofendimeve dhe sulmeve që ai pretendon se ka marrë nga përfaqësuesit e LVV-së.

Sa i përket gjuhës, këtë spirale të sulmeve dhe akuzave e ka nisur vetë subjekti që ka qeverisur në Kosovë në pesë vitet e fundit, duke mos e kursyer askënd — politikanë, analistë dhe gazetarë – madje ka shkuar deri në pretendime për lidhje me Serbinë.