Matematika e luftës në Ukrainë, duhen eliminuar 50 mijë ushtarë rusë në muaj

Kalimi nga shifra rekord prej 35.000 ushtarësh rusë të eliminuar në dhjetor në një mesatare mujore prej 50.000; shumëfishimi i prodhimit të dronëve të gjeneratës së re; dhe ndërtimi i një bashkëpunimi gjithnjë e më të strukturuar mes industrive ushtarake dhe ushtarëve në fushëbetejë. Ministri i ri i Mbrojtjes i Ukrainës, Mykhailo Fedorov, ende nuk është ambientuar plotësisht në zyrën e tij (është emëruar më 14 janar), por tashmë ka ide shumë të qarta për programet e tij të ardhshme.

Ai i quan këto plane “matematika e luftës”, me bindjen se fuqia ushtarake ruse është vetëm në dukje superiore ndaj asaj ukrainase. Sipas tij, nëse Kievi arrin të shfrytëzojë në mënyrë racionale burimet e veta, ndihmën e aleatëve dhe mbi të gjitha inteligjencën e kapitalit njerëzor, atëherë lufta mund të fitohet.

Bashkëpunëtor i Zelenskyt që nga koha kur presidenti ishte ende aktor dhe ai një i sapodiplomuar i konsideruar gjeni i informatikës, Fedorov u emërua ministër i Transformimit Digjital para se të mbushte 30 vjeç. Sot, në moshën 35-vjeçare, ai ndodhet në krye të asaj që shumë ekspertë ushtarakë dhe oficerë të NATO-s e konsiderojnë tashmë ushtria më e fortë dhe më inovative e Evropës.

Të shtunën e kaluar, ai vetë organizoi një takim off the record me rreth tridhjetë përfaqësues të mediave vendase dhe të huaja, mes tyre edhe Corriere della Sera. Citimet e përfshira këtu janë ato të autorizuara. Por para së gjithash, vlen të theksohet stili: më shumë sesa një briefing tradicional, takimi ngjante me një konferencë për inxhinierë të industrisë së armëve ose me një seminar të shkencave ekonomike.

Armë dhe të dhëna

Fedorov në podium shpjegonte slide-t e shumta të prezantimit të tij, të mbushura me grafikë dhe statistika: llojet e dronëve dhe raketave të lëshuara nga rusët që nga viti 2022, itineraret e tyre kryesore, bazat e nisjes, normat e rrëzimit nga mbrojtja ajrore ukrainase, me treguesit e dështimeve dhe arsyet përkatëse. Më pas, gjeografia e betejave, numrat e të rënëve, sidomos tabelat e mjeteve ruse të kapura ose të nxjerra jashtë përdorimit. Në fund, modelet e dronëve të rinj në zhvillim.

Risia e madhe e muajve të fundit është inteligjenca artificiale e integruar në raketa dhe sidomos në dronë, të cilët tani janë të pamundur për t’u neutralizuar me sistemet tradicionale të bllokimit elektronik (jamming), sepse fluturojnë në mënyrë autonome. E njëjta gjë vlen edhe për dronët e drejtuar me kabllo fibër optike, të cilët vitin e kaluar i kishin dhënë avantazh rusëve.

Në 48 orët e fundit ka hyrë gjithashtu në funksion projekti “Mission Control”, për të monitoruar efektet e çdo veprimi të dronëve dhe që pritet të zgjerohet edhe te artileria. Ministri shpjegon: “Po unifikojmë të gjitha operacionet e dronëve tanë në një sistem të vetëm digjital”. E gjithë kjo shërben për të përshpejtuar vendimmarrjen. “Për herë të parë, komandantët do të kenë në kohë reale të gjitha të dhënat e rëndësishme për misionin e tyre, pa u përballur me asnjë vonesë burokratike”.

T’i rezistosh dimrit

Do të ketë gjithashtu shpërblime monetare veçanërisht të larta për patrullat që arrijnë të gjuajnë dhe eliminojnë operatorët e dronëve armikë. Nëse është e vërtetë që 75% e humbjeve në të dy ushtritë i atribuohen sulmeve të dronëve, siç pohojnë vëzhguesit perëndimorë dhe blogerët rusë, nuk është çudi që Fedorov i kushton kësaj fushe vëmendjen maksimale.

“Kjo është logjika e matematikës së re të luftës: të luftosh në mënyrë sistematike, teknologjike dhe efikase”, komenton ministri. Është gjithsesi e pamohueshme që ardhja e tij ka sjellë një frymë optimizmi në Kiev. “Nëse arrijnë t’i përballojnë sulmet ruse gjatë dimrit, atëherë nga marsi ose prilli ukrainasit do të jenë në avantazh”, ka deklaruar në Davos ish-i dërguari i Trumpit për Ukrainën, Keith Kellogg.

Ndoshta ky entuziazëm është disi i parakohshëm, por premisat aktuale priren ta justifikojnë. Pas deklaratave optimiste të Putinit mes nëntorit dhe dhjetorit, realiteti në terren tregon se avancimet ruse mbeten shumë të kufizuara në të gjithë Donbasin. Ukrainasit ende kontrollojnë një pjesë të Pokrovskut dhe Mirnohradit, të cilat presidenti rus i kishte shpallur si të pushtuara. Rusët kanë humbur terren në Kupiansk dhe kanë bërë përparime të vogla në sektorin jugor mes Zaporizhzhias dhe Huliaipoles. Por sipas Fedorovit, bëhet fjalë për korrigjime të vogla të vijës së frontit, të destinuara të rezultojnë të përkohshme. /Corriere della Sera/