Para mesnatës të të shtunës ka mbërritur në Rinas një tjetër avion nga Kabuli me 95 pasagjerë, 2 prej të cilëve foshnje. Grupi u prit nga ministrja Olta Xhaçka dhe ambasadorja Yuri Kim.
Ky është fluturimi i dytë drejt Shqipërisë, që sjell shtetas afganë për t’u strehuar përkohësisht si pjesë e përpjekjeve ndërkombëtare për t’i shpëtuar ata nga dhuna e talebanëve në Afganistan.
Sipas ministres së Jashtme, Olta Xhaçka, e cila po koordinon përpjekjet e Shqipërisë në ndihmën për afganët e shpërngulur, “derisa të lirohen strukturat hoteliere nga piku i sezonit turistik, grupet e tjera të afganëve, që do të vijnë në vazhdim, do të strehohen për pak ditë në konviktet e Qytetit Studenti”.
Pak kohë pas avionit të dytë mbërriti edhe një grup i tretë me 59 qytetarë afganë me një avion, që erdhi nga Doha. Ata u pritën në aeroport kryeministri Edi Rama dhe ambasadorja e SHBA-së, Yuri Kim.
“Mirëmëngjes pa u gdhirë. Dhe nga Rinasi ku deri sot kanë mbërritur 275 të arratisur nga Afganistani fatkeq, ndër të cilët edhe gra aktiviste të shoqërisë civile, pedagogë, punonjës institucionesh, gazetarë, së bashku me familjet e tyre, ju uroj një fundjavë të qetë.”, shkroi kryeministri në rrjete sociale.
Grupi i parë i qytetarëve afganë nga Kabuli mbërriti në aeroportin ndërkombëtar “Nënë Tereza” në orët e para të mëngjesit të së premtes. Ata tashmë janë strehuar përkohësisht në hotele të sigurt pranë Durrësit.
