“Më mungon çdo sekondë”, rrëfehet për herë të parë bashkëshortja e policit të vrarë në Kaçanik

Muhameti ishte vrarë  me armë zjarri, ndërsa po kthehej nga detyra. Violeta kujton me mall edhe fjalët e fundit që ndanë bashkë:

“Biseda e fundit ishte: ‘Nesër jam në punë paradite, e kemi me pi nga një kafe bashkë në mëngjes.’”, tregon ajo.

Ajo tregon se asnjëherë nuk kishte pasur ndonjë arsye për të dyshuar se bashkëshorti i saj mund të ishte në rrezik. Sipas saj, ai nuk kishte pasur probleme me askënd dhe asnjë shenjë paralajmëruese nuk kishte dalë në sipërfaqe.

“As edhe një mesazh s’ka ardhur ndonjëherë. S’ka ndryshuar kurrë sjellja e tij. Ai ka qenë i pastër.”

Violeta reagoi gjithashtu ndaj zërave që dolën në opinion pas vrasjes, të cilat sugjeronin një lidhje jashtëmartesore të Muhametit , pretendime që ajo i mohon kategorikisht.

“Janë shpifje. Ai që e ka thënë, le ta thotë me fytyrë. Nuk është aspak e vërtetë. Ai ka qenë më i pastri që ekziston.”

Dhimbja e saj është e dyfishtë – jo vetëm për humbjen, por edhe për ëndrrat dhe planet e përbashkëta që u ndërprenë në mes.

“Donim të bëheshim prindër. Kishim plane  me u shpërngul në banesën e re, me zgjeru biznesin… gjithçka e kishim ndërtuar bashkë.”

E pyetur për të arrestuarit në lidhje me vrasjen, Violeta shprehet:

“Disa prej tyre i njoh, por ai s’ka pasur asnjë lidhje me ta. Vetëm njëri ka punuar për ne për rreth dy vjet. Ata që e kanë bërë, le të marrin dënimin e merituar.”

Në fund, ajo e mbyll rrëfimin me një dhimbje të thellë që nuk shuhet:

“Më mungon çdo sekondë. Kam qenë shumë e lidhur me të. Gjithçka kemi bërë bashkë.”