Merz: Putin nuk ka shanse ta fitojë luftën në Ukrainë

Kancelari gjerman Friedrich Merz deklaroi sot më 26 nëntor 2025 se lideri i Kremlinit, Vladimir Putin, duhet të kuptojë se nuk ka asnjë mundësi për të fituar luftën kundër Ukrainës.

Gjatë një fjalimi në Bundestagun gjerman, Merz theksoi se ruajtja e paqes në Europë është një nga parimet kryesore të qeverisë së tij dhe se përfundimi i luftës nuk duhet të nënkuptojë kapitullim.

Ai shtoi se është e domosdoshme të ruhet uniteti midis vendeve europiane dhe Shteteve të Bashkuara.

“Pa miratimin e Ukrainës dhe pa miratimin e europianëve, nuk mund të ketë një bazë për një paqe të vërtetë dhe të qëndrueshme në Ukrainë”. Merz gjithashtu mirëpriti përpjekjet e Presidentit amerikan Donald Trump për të ndihmuar në përfundimin e konfliktit.

Ai nënvizoi se çështjet europiane mund të vendosen vetëm me marrëveshje me Europën, pasi Europa është jo një gur lëvizës, por një aktor sovran me interesat dhe vlerat e veta, raporton Yahoo News.

Kancelari gjerman theksoi se Rusia mund të përfundojë luftën brenda pak minutash nëse do të donte vërtet, dhe se Gjermania do të vazhdojë të mbështesë Ukrainën, sa më gjatë të jetë e mundur. Ai gjithashtu mbështeti idenë e përdorimit të pasurive të ngrira ruse, për të financuar ndihmën ndaj Ukrainës.

“Putin duhet të kuptojë se nuk ka shans të fitojë këtë luftë në kurriz të rendit europian të lirisë dhe paqes”. Ai konfirmoi gjithashtu se Gjermania do të rrisë ndihmën për Ukrainën vitin e ardhshëm me një total prej 11.5 miliardë eurosh, duke përfshirë mbështetjen financiare, ushtarake dhe humanitare.