National Geographic: “Magjia e heli-skijimit në Alpet e Shqipërisë”

National Geographic i ka kushtuar një artikull bukurive të Alpeve shqiptare, duke i sugjeruar si një vend të përshtatshëm për skiatorët e apasionuar.

“Nëse jeni duke kërkuar emocione, provoni heli-skijimin në Malet e egra të Shqipërisë, apo si quhen ndryshe Bjeshkët e Nemuna”, shkruhet në artikull.

Në këtë reportazh përshkruhet udhëtimi i një grupi skiatorësh që kanë zgjedhur të eksplorojnë Alpet e Shqipërisë nëpërmjet heli-skijimit, pasi majat e këtyre maleve mund të arrihen vetëm me helikopter.

Sipas artikullit të National Geographic, Malet e Mallkuara, të njohura ndryshe si Alpet Shqiptare, formojnë një mur të egër midis Kosovës dhe Malit të Zi, dhe këto bukuri ballkanike ofrojnë terren të egër kufitar për heli-skiatorët e guximshëm.

Turistët janë të rrallë, sidomos në thellësi të dimrit. Megjithatë, terreni është ideal për llojin e skijimit në natyrë që ky grup skiatorësh ka zgjedhur. Ata qëndruan në Luginën e Valbonës, majat e të cilit thuhet se u kujtojnë Dolomitet e Italisë.

Në Malet e Nemuna në Shqipëri nuk ka infrastrukturë malore për ski. Nuk ka teleferikë apo pista, dhe as shumë rrugë hyrëse. Kjo e bën atë ideale për heli-ski.

Maja më e lartë në Parkun Kombëtar të Valbonës është Mali Jezercë, 2,694 metra mbi nivelin e detit. Por sipas alpinistëve, afërsia e Adriatikut, ku stuhitë e dimrit mbledhin lagështi, bën që në Malet e Mallkuara sasia e dëborës të arrijë deri në 15 metra në një sezon të mirë – e njëjta sasi si në Niseko, Japoni.

Ata zbresin majat e thepisura të Alpeve Shqiptare, duke shijuar borën e paprekur kurrë më parë nga skiatorët.