Ndihma nga amerikanët për rastin Dehari, Kryeprokurori Lumezi e ndërron deklaratën

Pas publikimit të ekspertizës për rastin Dehari dje, një portal publikoi një deklaratë të Kryeprokurorit, ku Lumezi citohet se ka “kërkuar prej Ambasadës Amerikane që të na sjellin ndonjë prokuror apo dikë që mund të na ndihmoj në hetimin e këtij rasti, në mënyrë që t’a zbardhim të vërtetën”.

Sot, ndërkaq zyra e Kryeprokurorit të Shtetit ka bërë një reagim ku thotë se një ndihmë e tillë nga amerikanët do të kërkohet vetëm pasi “autoritetet vendore të bëjnë të gjitha veprimet e duhura për ndriçimin e plotë të rastit të Astrit Deharit, do të kërkohet ndihmë juridike nga Ambasada Amerikane në Kosovë”

Në reagim thuhet se disa media kanë keqinterpretuar deklaratën e Lumezit edhe pse në bazë të saj çfarë është publikuar në portalin arbëresh.info, ku fjalët e kryeprokurorit citohen si ligjëratë e drejtë, del se nuk ka asnjë keqinterpretim. Por, Lumezi nuk e ka fajësuar portalin që ka transmetuat fjalët e tij, por mediat tjera që janë bazuar në atë portal.

Reagimi i plotë

Prishtinë, 25 tetor 2019 – Zyra e Kryeprokurorit të Shtetit sqaron opinionin se disa media kanë keqinterpretuar deklaratën e Kryeprokurorit të Shtetit, Aleksandër Lumezi, dhënë mediumit “Abresh.info”, më datën 24.10.2019, me titull “Kryeprokurori Lumezi: Do të kërkojmë ndihmë nga Ambasada Amerikane për hetimin e rastit të Astrit Deharit”.

Për hir të informimit të drejtë të opinionit publik, Zyra e Kryeprokurorit të Shtetit ju informon se Kryeprokurori i Shtetit, Aleksandër Lumezi, decidivisht ka deklaruar se nëse është e nevojshme, pas ndërmarrjes se të gjitha veprimeve të duhura nga autoritetet vendore për ndriçimin e plotë të rastit të Astrit Deharit, do të kërkohet ndihmë juridike nga Ambasada Amerikane në Kosovë.

Në këtë kontekst, kjo ndihmë eventuale do të realizohet nëpërmjet ndihmës juridike ndërkombëtare me anë të ekspertizave dhe ekzaminimeve profesionale, të cilat janë të nevojshme për zbardhjen e rrethanave të procedurës penale të këtij rasti, ashtu siç parashihet në Kodin e Procedurës Penale dhe ligjet e tjera në fuqi në Republikën e Kosovës.