Në Singapor dënohesh me vdekje edhe për gjysmë kg kanabis, rekord ekzekutimesh këtë vit

Singapori ka ekzekutuar tre persona brenda dy ditëve, për vepra të lidhura me drogën, duke e çuar në 17 numrin total të dënimeve me vdekje të kryera këtë vit, shifra më e lartë që prej vitit 2003. Ekzekutimet vijnë vetëm një javë para se Gjykata e Lartë të shqyrtojë një çështje ku ky lloj dënimi pretendohet se është antikushtetues.

Singapori njihet për ligjet ndër më të ashpra në botë kundër narkotikëve, të cilat qeveria i konsideron thelbësore për parandalimin e kriminalitetit dhe ruajtjen e sigurisë publike, shkruan A2 CNN. Sipas legjislacionit aktual, çdo person i dënuar për trafikim sasish të caktuara, mbi 15 gramë diamorfinë, 30 gramë kokainë, 250 gramë metamfetaminë ose 500 gramë kanabis, dënohet automatikisht me vdekje.

Shtatë aktivistë kanë sfiduar ligjin, duke argumentuar se dënimi i detyrueshëm me vdekje shkel të drejtën kushtetuese për jetën dhe mbrojtjen e barabartë para ligjit. Ata theksojnë se Singapori mbetet një nga vendet e pakta që vazhdon ekzekutimet për krime të drogës, ndërsa komuniteti ndërkombëtar ka lëvizur drejt heqjes së tyre.

Autoritetet mbrojnë qëndrimin e tyre, duke paralajmëruar se heqja e dënimit me vdekje do të sillte pasoja të rënda, përfshirë rritjen e kriminalitetit, dhunës dhe vdekjeve të lidhura me drogën. Ministri i Brendshëm K. Shanmugam ka deklaruar se politika penale është hartuar për të mbrojtur shumicën e qytetarëve dhe për të shmangur rrezikun ndaj të pafajshmëve.

Ndër të ekzekutuarit ishte edhe shoferi malajzian Saminathan Selvaraju, i dënuar për transportimin e mbi 300 gramëve heroinë në vitin 2013. Mbrojtja e tij, ku pretendonte se nuk kishte qenë ai drejtuesi i mjetit në momentin e hyrjes së drogës në vend, u refuzua nga gjykata.

Kritikët vënë në dukje se ligjet godasin kryesisht korrierët e varfër dhe jo organizatorët e trafikut. Bashkimi Europian dënoi rritjen e ekzekutimeve, duke theksuar se krimet e drogës nuk përmbushin kriterin e “krimeve më të rënda” sipas të drejtës ndërkombëtare. Ndërkohë, një sondazh i vitit 2023 tregon se shumica e qytetarëve mbështesin dënimin kapital për trafikim në shkallë të madhe, çka pasqyron ndarjen e thellë të opinionit publik mbi këtë çështje.