Një ditë para hapjes së fushatës, Qeveria miraton rritjen prej 20% të pensioneve për kategoritë e dala nga lufta

Në mbledhjen e mbajtur të premten, Qeveria e Kosovës ka marrë vendim për rritjen prej 20% të pensioneve për kategoritë e dala nga lufta, duke përfshirë familjet e dëshmorëve, ato të të zhdukurve, si dhe pensionet për invalidët e UÇK-së.

Ky vendim u mor një ditë para hapjes zyrtare të fushatës.

Ministri i Financave, Hekuran Murati, ka dhënë detaje rreth këtij vendimi, duke shpjeguar se për familjet e dëshmorëve të UÇK-së, rritja do të jetë 20% për ato që kanë një dëshmor, ndërsa për familjet me më shumë dëshmorë, rritja do të jetë edhe më e madhe.

Po ashtu, ai ka thënë se pensionet familjare për familjet e të zhdukurve dhe pensionet invalidore për invalidët e UÇK-së do të përfitojnë gjithashtu këtë rritje.

“Rritje prej 20% do të kenë edhe pensionet familjare për invalidët e UÇK-së pas vdekjes së invalidit të UÇK-së”, ka thënë Murati.