Rruga për në Malësinë e Madhe ofron jo vetëm peisazhe të bukura por edhe histori. Në Hot gjendet kulla e Çun Mulës, luftëtarit të pamposhtur për liri e çlirim kombëtar.
Shtëpia me tre kate e kishte humbur prej vitesh “krenarinë” e saj për shkak të degradimit të vazhdueshëm që i sillte koha. Për fatin e mirë iniciativa e trashëgimtarëve të familjes dhe shqiptarëve që jetojnë kryesisht në SHBA bëri që kulla e Çun Mulës të marrë rrugën drejt shndërrimit në një muze të mirëfilltë të Malësisë së Madhe.
“Është një punë kolosale që para dy vjetësh kur e kemi filluar nuk e imagjinonim dot që do të arrinim të bënin inaugurimin e kullës së rinovuar”, u shpreh Arian Bajraktari, Trashëgimtar i familjes së Çun Mulës.
Malësisë së Madhe i mungonte një muze i mirëfilltë dhe kulla e Çun Mulës duket se do ta kryejë më së miri misionin e ri të saj. Për kullën është dashur një ndërhyrje deri në detaje por duke ruajtur në çdo rast elementët autentikë.
Kulla e Çun Mulës dhe shndërrimi i saj në muze do t’i rikthejë Malësisë së Madhe një krenari që ajo e meritonte ta kishte prej kohësh.
/RTSH/
