Novi Sadi mbrëmë kaloi në kaos, thyhen xhamat e bashkisë, Vuçiqi prej zyrës kërcënoi protestuesit me ndëshkim

Gjatë mbrëmjes së djeshme në qytetin serb të Novi Sadit ka nisur një protestë lidhur me fatkeqësinë e ndodhur gjatë javës së kaluar, ku humbën jetën 14 persona.

Protestuesit kanë arritur deri te bashkia e qytetit, ku janë thyer xhamat dhe kanë gjuajtur me gurë në këto objekte.

Demonstruesit kërkojnë që deputetët të dorëzojnë kërkesat për dorëheqjen e strukturave qeverisëse, shkruan danas.rs.

Theksojmë se ministri i Ndërtimit në Qeverinë e Serbisë, Goran Vesiq, dje në mëngjes ka dorëzuar zyrtarisht dorëheqjen të cilën e ka bërë të ditur në konferencën e mbrëmshme për media.

Ndërkohë, presidenti serb, Aleksandar Vuçiq prej zyrës së tij ka reaguar duke pohuar se protestuesit kanë “të drejtë të sillen si të pamoralshëm në vendin tonë, është e lejuar. Ju keni të drejtë të jeni të pamoralshëm, por nuk keni të drejtë të rrezikoni të tjerët. Mesazhi im është që policia po tregohet shumë e përmbajtur, por mos mendoni se dhuna është e lejuar. Të gjithë ata që kanë marrë pjesë do të ndëshkohen dhe do të ndiqen nga shteti”.

Policia lëshoi një sasi të madhe gaz lotsjellës mbi protestuesit, ku disa prej tyre edhe kanë pësuar lëndime.

Ndryshe, streha e betonit e stacionit hekurudhor të qytetit ishte shembur dhe kishte rënë mbi disa qytetarë, ku 14 prej tyre humbën jetën. Tre persona janë ende në gjendje të rëndë në spital.