Gazeta pro qeveritare serbe “Veçernje Novosti” pretendon se edhe përkundër mohimit të autoriteteve malaziase, në rast të përkeqësimit të situatës “mund të angazhohen pjesëtarët e forcave speciale të Kosovës”, për ta ndihmuar Ushtrinë e Malit të Zi në ruajtjen e rendit publik në këtë vend.
“Një pjesë e pjesëtarëve të Ushtrisë së Malit të Zi ka marrë instruksione nga eprorët e tyre se në rast të përkeqësimit të situatës së sigurisë mund ta ndihmojnë policinë”, shkruan gazeta.
UMZ ka marrë instruksione me rastin e protestave për shkak të Ligjit mbi Lirinë e Besimit, ushtria mund të angazhohet si ndihmë për policinë në ruajtje të rendit publik, shkruan “Veçernje Novosti”.
Siç pretendon kjo gazetë, ky veprim i kreut ushtarak malazias “ka shkaktuar pakënaqësi të pjesëtarëve të UMZ, të cilët në këtë shohin si përpjekje që forcat e armatosura të vihen në shërbim të politikës dhe ata t’i kthejnë kundër popullit të tyre”.
“Frikën” e oficerëve dhe ushtarëve e “forcojnë edhe më tepër” thashethemet për “angazhimin e mundshëm të vendeve miqësore fqinje”, pretendon gazeta.
Gazeta shton se përkundër mohimit të autoriteteve malaziase se në rast të përkeqësimit të situatës “mund të kyçen edhe pjesëtarët e forcave speciale të Kosovës”, në mes pjesëtarëve të UMZ “ende ekziston frika për këtë”.
