Operacioni anti-kurd: Turqisë i kanosen sanksione nga SHBA-ja

Republikanët në Dhomën e Përfaqësuesve të Shteteve të Bashkuara po bëjnë gati një ligj sanksionesh kundër Turqisë, për shkak të ofensivës së saj në Siri.

Kongresistja Liz Cheney tha se Turqia “duhet të përballet me pasoja serioze për sulmet e pamëshirshme ndaj aleatëve tanë kurdë”.

Turqia nisi të mërkurën një operacion ushtarak kundër kurdëve në veri të Sirisë, për të eliminuar, siç tha, “terrorin” përgjatë kufijve të saj.

Operacioni nisi pasi presidenti i Shteteve të Bashkuara, Donald Trump, urdhëroi tërheqjen e trupave nga zona.

Turqia i konsideron milicitë kurde në Siri si pjesë të Partisë së ndaluar të Punëtorëve të Kurdistanit, e cila ka luftuar për autonominë kurde brenda Turqisë për tri dekada me radhë.

Këto milici, që kanë qenë aleate të forcave amerikane në luftën kundër grupit militant Shteti Islamik në Siri, e mohojnë çdo lidhje të drejtpërdrejtë organizative me Partinë e Punëtorëve të Kurdistanit.

Një grup prej 29 republikanësh në Dhomën e Përfaqësuesve në SHBA hartoi legjislacionin për sanksione kundër Ankarasë.

“Nëse Turqia dëshiron të trajtohet si aleate, ajo duhet të fillojë të sillet si e tillë”, tha kongresistja Cheney.

“Kongresi, prej kohësh, ka shqetësime për bashkëpunimin e regjimit të Erdoganit me kundërshtarët amerikanë, të tillë si Rusia”, tha ajo.

Presidenti Trump e mbrojti vendimin e tij për tërheqje të trupave nga Siria, duke thënë në një rast se kurdët “nuk na kanë ndihmiar neve në Luftën e Dytë Botërore”.

Por, ai mori një qëndrim më të ashpër ndaj ofensivës së Turqisë, për shkak të kritikave në SHBA dhe jashtë saj.

Trump tha se sanksionet mund të ndërmerren nëse operacioni i Turqisë “nuk është njerëzor”.

Një zyrtar amerikan u tha gazetarëve se vija e kuqe nënkupton “spastrim etnik, sulme ajrore, me artileri dhe të tjera kundër popullatës civile”.

Të enjten, në një postim në Twitter, Trump tha se SHBA-ja ka pasur tri zgjedhje: të dërgojë mijëra trupa (në Siri) dhe të fitojë ushtarakisht, të godasë rëndë Turqinë me sanksione ose të ndërmjetësojë një marrëveshje midis Turqisë dhe kurdëve.

“Shpresoj të jetë kjo e fundit”, u tha më pas Trump gazetarëve.

Erdogan i hodhi poshtë kritikat ndërkombëtare për operacionin në lindje të Lumit Eufrat, duke përsëritur se ofensiva ka për qëllim “të eliminojë terrorin” përgjatë kufijve të Turqisë.

“Që nga fillimi i operacionit, 109 terroristë janë vrarë”, tha Erdogan duke iu referuar luftëtarëve kurdë.

Më herët, ai ka thënë se dëshiron të krijojë një “zonë të sigurt” atje, ku edhe do të dërgonte miliona refugjatë sirianë.

Luftimet bënë që dhjetëra-mijëra njerëz të ikin nga shtëpitë e tyre, ndërsa dhjetëra të tjerë raportohet të jenë vrarë./REL