Osmani: Macron na dha mbështetje për paqe dhe siguri, i treguam për dialogun dhe bojkotin nga serbët

Presidentja e Kosovës, Vjosa Osmani ka folur pas takimit që pati me presidentin e Francës, Emmanuel Macron dhe kryeministrin Albin Kurti në Paris.

Osmani tha se Macron ju ka ofruar mbështetje për paqe, siguri dhe stabilitet në Kosovë dhe rajon.

Ndërkaq, shton se kanë ritheksuar rëndësinë e liberalizimit të vizave dhe kanë kërkuan vazhdimin e mbështetjes së Francës për integrimin euroatlantik të Kosovës dhe anëtarësimin në organizata tjera ndërkombëtare.

Po ashtu, Osmani deklaroi se ka ngritur edhe çështjen e bojkotimit të institucioneve të Kosovës nga zyrtarët serb.

Postimi i plotë:

Në Pallatin Élysée, bashkë me Kryeministrin Kurti, u pritëm nga Presidenti i Francës, Emmanuel Macron për të diskutuar partneritetin në mes të dy shteteve tona, dinamizimin e dialogut me Serbinë, si dhe zhvillimet e fundit në vendin tonë.

Shprehëm përkushtimin e plotë të institucioneve të Kosovës për procesin e dialogut, të bazuar në ruajtjen e sovranitetit, rendit kushtetues, integritetit territorial dhe funksionalitetit të Kosovës, të cilat janë të paprekshme.

Diskutuam edhe veprimet destabilizuese të Serbisë, përmes fuqizimit të strukturave ilegale të saj në Kosovë, frikësimit të qytetarëve serbë dhe nxitjes së grupeve kriminale për ta cenuar rendin dhe ligjin në veri. Kosova mbetet e angazhuar, në koordinim me partnerët ndërkombëtar, për paqe, stabilitet dhe për të garantuar një mjedis të sigurt për të gjithë qytetarët e vendit. Ndërkaq, Presidenti Macron potencoi përkrahjen e tij për paqe, siguri dhe stabilitet në Kosovë dhe rajon.

Në takim, ritheksuam rëndësinë e përfundimit të procesit të liberalizimit të vizave përgjatë presidencës çeke të Këshillit të BE-së, si dhe kërkuam vazhdimin e mbështetjes së Francës për integrimin euroatlantik të Kosovës dhe anëtarësimin në organizata tjera ndërkombëtare.