Osmani: Rusia nëpërmjet Serbisë synon destabilizimin e rajonit

“Kosova ka miq të shumtë në botë, e këto miqësi vetëm sa do t’i shtojmë e do t’i thellojmë”, kështu është shprehur Presidentja e Kosovës, Vjosa Osmani pas përfundimit të Konferencës së Mynihut, njërës prej arenave më të mëdha të takimeve diplomatike, ku ajo përfaqësoi shtetin e Kosovës së bashku me kryeministrin Albin Kurti dhe Ministren e Jashtme, Donika Gërvalla.

Osmani tha se këto ishin tri intensive dhe gjatë kësaj kohe u siguruan që të përçojnë mesazhin se Kosova është shembull i paqes dhe stabilitetit në rajon.

“Ishin tri ditë intensive në Konferencën e Sigurisë në Mynih, ku së bashku me Kryeministrin Kurti dhe Zëvendëskryeministren Gërvalla, diskutuam në një numër panelesh e tryezash dhe takuam përfaqësues të shteteve të tjera dhe të organizatave ndërkombëtare. Në të gjitha këto organizime si dhe takime e diskutime bilaterale, përçuam mesazhin se Kosova është shembull i shkëlqyeshëm i kontributit për paqe e stabilitet në rajon, duke kryer njëkohësisht një sërë reformash brenda vendit të cilat po përkrahen fuqishëm nga qytetarët por edhe nga partnerët ndërkombëtarë”, shkruan Osmani në një postim në Facebook ku i ka bashkangjitur dhjetëra foto takimet.

Tutje Osmani ka thënë se procesi i integrimit në strukturat euro-atlantike është i detyrueshëm për Kosovën dhe se kërcënimi i Rusisë është i madh për botën perëndimore. Ajo ka shtuar se Rusia po kërkon të destabilizojë rajonin përmes Serbisë.
“Përkushtimin tonë në procesin e integrimit në struktura euro-atlantike, përtej aspektit deklarativ, po e dëshmojmë me veprime konkrete, prandaj është imperative që e ardhmja e vendit tonë në këto struktura të garantohet duke pasur parasysh ndikimin çdo ditë e më të madh të Rusisë, nëpërmjet Serbisë që ka për qëllim destabilizimin e rajonit. Në takime me presidentë, kryeministra, ministra të jashtëm, ministra të mbrojtjes, senatorë, udhëheqës të organizatave ndërkombëtare e përfaqësues të shoqërisë civile, gjithnjë synojmë avancimin e raporteve me shtete të tjera dhe shtyrjen përpara të interesave të Republikës së Kosovës dhe të qytetarëve të saj”, shtoi tutje ajo.