Pamje të aksionit policor, kontrollohen 22 qendra masazhi e mbyllen disa prej tyre

Dhjetëra njësi të Policisë së Kosovës dhe inspektorë të tregut po bëhen gati për një aksion të përbashkët të koduar “Kontrolli”.

Të ndarë në 10 njësi, pjesë e së cilave ishin departamenti i migracionit, ai i trafikimit me qenie njerëzore, inspektorë të Komunës, dhe ata të punës e të tregtisë, aksioni nisi në kryeqytet.

Në lokacionin e parë në lagjen “Arbëria”, Policia ka hasur në klientë duke pritur para një qendre masazhi.

Klientët ishin të ardhur nga Siria dhe komunikimi me ta ishte i vështirë, megjithëse e thoshin qartë se kishin ardhur nga kampi për të bërë masazh, raporton KOHA.

E meqë klientët prisnin për shërbime, Policia e bindur se brenda është duke u punuar mori urdhrin nga Prokuroria për të thyer derën.

Këtu nuk gjetën asgjë, e sirianët u dërguan në stacionin policor pasi kishin thyer urdhrin e lëvizjes.

Në një lagje tjetër, një tjetër njësi ka hasur në një lokal masazhi të hapur.

5 punëtore, një klient dhe dy pronarë që ishin vëllezër kanë qenë në këtë lokal masazhi në momentin e intervenimit.

Ministria e Tregtisë vendosi ta mbyllë atë pasi kjo veprimtari nuk është e lejuar të operojë në fazën e dytë të lehtësimit të masave, që nisi në fillim të javës.

Megjithatë, në dyert e lokalit, pronarët e qendrës së masazhit ishin kujdesur që t’ua përkujtonin klientëve që të mbanin distancën prej 1 .5 metrave.

Policia ka polemizuar me pronarët.

Në lagjen “Mati 1” derisa aksioni po vazhdonte, inspektorët e Tregut nuk ishin të një mendimi ndërmjet vete dhe nuk u pajtuan për mbylljen e lokalit.

Policia planifikonte ta mbyllte aksionin.

Pronarët e lokalit, shtetas nga Shqipëria, i kanë deklaruar KTV-së se ishin keqkuptuar për lejimin e veprimtarisë, pasi kanë menduar se qendrat e tyre lejohen të punojnë, duke i konsideruar të së njëjtës veprimtari me fizioterapeutët.

Por, me ardhjen e inspektorëve të punës ndërroi situata. Lokali u mbyll pas kontrollit që gjeti shumë parregullsi, duke përfshirë dy punëtore lokale pa kontrata pune.

Arsyetimi i pronares ishte se ato kishin filluar punën në ditën e aksionit.

Bazuar në urdhëresat e prokurorive kompetente janë realizuar kontrolle në 14 lokacione në kryeqytet, prej tyre 6 kanë qenë të hapura, ku janë takuar 23 persona, ndaj të cilëve janë marrë masat e nevojshme ligjore.

Në Ferizaj objekt kontrolli kanë qenë 3 lokacione, por që kanë qenë të mbyllura, përderisa është kontrolluar edhe një restorant, por nuk është vërejtur ndonjë shkelje.

Ndërkaq 2 prej katër lokaleve të kontrolluara në Prizren kanë qenë të hapura, ku janë takuar 12 persona, ndaj të cilëve janë marrë masat e nevojshme ligjore.