Panik, ndërsa Rusia ka urdhëruar evakuimin e një qyteti afër centralit bërthamor të Zaporizhzhias

Rusia ka krijuar panik, ndërsa po evakuon një qytet në afërsi të centralit bërthamor në Zaporizhzhia, që është më i madhi në Evropë, raporton BBC.

Ukraina ka pretenduar se Rusia u ka thënë njerëzve në 18 lokalitete në afërsi të rajonit Zaporizhzhia, përfshirë edhe atij Enerhodar në afërsi të centralit, që të largohen.

Kryetari i Melitopolit, Ivan Fedorov, ka thënë se ka deri 5 orë pritje ndërsa mijëra vetura po largohen.

Agjencia Ndërkombëtare për Energji Bërthamore (IAEA) ka thënë se situata rreth centralit të Zaporizhzhias po bëhet shumë e paparashikueshme dhe e rrezikshme.

“Derista stafi operues mbetet në kompleks, ka shqetësime të mëdha për kushte tensionuese e sfiduese të personelit dhe familjeve të tyre”, ka thënë drejtori i IAEA-s, Rafael Grossi, raporton BBC.

Të premten, kreu rajonal i vendosur nga Rusia, Yevgeny Balitsky, ka thënë se në “Ukraina ka rritur granatimet në vendbanime afër vijës së frontit”.

“Për këtë kam marrë vendim të evakuohen së pari fëmijët dhe prindërit, personat e moshuar, personat me aftësi të kufizuara dhe pacientët që janë në spitale”, ka shkruar ai në rrjete sociale.