Paralajmërimi dramatik i shefit të mbrojtjes së Pakistanit: Pushtimi i Indisë në vendin tonë është i pashmangshëm

Ministri i Mbrojtjes së Pakistanit deklaroi të hënën se një pushtim ushtarak nga India fqinje është i pashmangshëm pas sulmit vdekjeprurës nga militantët ndaj turistëve në Kashmir javën e kaluar, ndërsa tensionet mes dy kombeve të armatosura me armë bërthamore janë në rritje.

Në sulmin e militantëve u vranë 26 persona, çka shkaktoi zemërim në Indi, ku shumicën e popullsisë e përbëjnë hindusët, duke u bërë thirrje për veprime kundër Pakistanit, vend me shumicë myslimane.

India e akuzon Pakistanin se mbështet aktivitetet militante në Kashmir, rajon për të cilin të dy vendet pretendojnë sovranitet dhe për të cilin kanë zhvilluar dy luftëra.

“Ne kemi forcuar trupat tona sepse tani kjo është diçka e pashmangshme. Në një situatë të tillë, është e nevojshme të merren disa vendime strategjike, dhe këto vendime janë marrë,” tha ministri i Mbrojtjes Khawaja Muhammad Asif për Reuters në një intervistë në zyrën e tij në Islamabad.

Asif deklaroi se India po e shton retorikën luftënxitëse dhe se ushtria pakistaneze ka informuar qeverinë për mundësinë e një sulmi indian. Ai nuk dha më shumë detaje rreth arsyeve pse e konsideron pushtimin si të pashmangshëm.

Pas sulmit në Kashmir, India identifikoi dy militantë të dyshuar si pakistanezë. Islamabadi e mohoi çdo përfshirje dhe kërkoi një hetim të pavarur.

Asif tha se Pakistani ndodhet në gjendje gatishmërie të lartë dhe se do të përdorte armët bërthamore vetëm në rast të një “kërcënimi të drejtpërdrejtë ndaj mbijetesës sonë”.