Në seancën e djeshme të Këshillit të Sigurimit të Organizatës së Kombeve të Bashkuara (OKB), përfaqësuesi i Shteteve të Bashkuara të Amerikës e akuzoi Serbinë për mosbashkëpunim me Gjykatën Penale Ndërkombëtare në Hagë, e cila dje ia konfirmoi dënimin me burgim të përjetshëm kriminelit Ratko Mlladiq.
Ai e cilësoi historike ditën e djeshme, ndërsa u shpreh tejet i kënaqur me vendimin për dënimin e Mlladiqit.
“Sot është ditë historike. Mlladiq u dënua. Tridhjetë vjet më parë, ai dhe mbështetësit e tij filluan një fushatë të spastrimit etnik dhe ne kujtojmë veçanërisht ditën kur ata hynë në Srebrenicë dhe vranë njerëz. Ne jemi të kënaqur me punën e gjykatës që mblodhi prova. Verdikti i ardhshëm për Stanishiqin dhe Stamatoviqin”, tha ambasadori amerikan në Këshillin e Sigurimit.
Ai theksoi se Serbia nuk i ka përmbushur detyrimet e saj, duke i bërë thirrje institucioneve serbe që t’i arrestojnë Millan Stamatoviqin (bashkëpunëtor i Mlladiqit) dhe Jovica Stanishiqin (ish-shef i UDB-së serbe), të kërkuar për frikësimin e dëshmitarëve.
“Ne jemi shumë të zhgënjyer që Serbia nuk i ka përmbushur detyrimet e saj dhe nuk i ka arrestuar dy persona për frikësimin e dëshmitarëve. Serbia është anëtare e OKB-së dhe si vend me detyrime të rëndësishme ndërkombëtare, është e detyruar të bashkëpunojë me Gjykatën. Ne i bëjmë thirrje Serbisë t’i arrestojë personat e kërkuar pa vonesë”, tha përfaqësuesi i SHBA-së.
Dhoma e Apelit e Gjykatës Penale Ndërkombëtare të Kombeve të Bashkuara dje e ka dënuar me burgim të përjetshëm kriminelin serb, Ratko Mlladiq. Kësisoj, është konfirmuar vendimi i shkallës së parë.
Gjykimi i gjeneralit të tmerrshëm serb filloi në maj të vitit 2012 dhe përfundoi më 15 dhjetor 2016. Ai u arrestua në Lazarevo në maj të vitit 2011, pasi u fsheh për 12 vjet dhe u ekstradua në Hagë. Më 25 korrik 1995, Prokuroria e Hagës ngriti aktakuzën e parë kundër Ratko Mlladiqit, në të cilën ai ishte së bashku me kriminelin tjetër, Radovan Karagjiq.
Irani ka njoftuar se ka pezulluar operacionet ushtarake kundër Izraelit, por ka paralajmëruar se do…
Zgjedhjet e parakohshme parlamentare të mbajtura dje në Kosovë kanë regjistruar pjesëmarrjen më të ulët…
Numërimi i afrohet 100 përqëindëshit: LVV 43,03 %, PDK 21.21 %, LDK 17.68 % dhe…
Lëvizja Vetëvendosje vazhdon të prijë në rezultatet preliminare të procesuara nga Komisioni Qendror i Zgjedhjeve…
Sot në Kosova janë mbajtur zgjedhjet e jashtëzakonshme parlamentare. Lidhur me këtë, është publikuar Exit…
Pamje të nxjerra jashtë kontekstit, imazhe të krijuara me Inteligjencë Artificiale dhe narrativa gjeopolitike u…