Petkoviq akuzon Rohden se po e luan rolin e “zëdhënësit të Kurtit”

Drejtori i të ashtuquajturës Zyrë për Kosovën në Qeverinë e Serbisë, Petar Petkoviq, ka kritikuar ashpër ambasadorin gjerman në Prishtinë, Jorn Rohde, duke e akuzuar për “kapërcim të kornizave diplomatike” dhe mbështetje të hapur ndaj kryeministrit të Kosovës, Albin Kurti.

Sipas Petkoviqit, Rohde ka shfaqur njëanshmëri të qartë duke përsëritur “dezinformatat e Kurtit dhe duke injoruar faktet e dukshme në terren”.

Në një status në Facebook të martën, Petkoviqi ka thënë se shefi i Qeverisë së Kosovës është i shqetësuar nga fitorja e Listës Serbe në zgjedhjet e fundit dhe se do të preferonte që në Kuvend të ishte më i fuqishëm ministri në detyrë për Komunitete dhe Kthim, Nenad Rashiqi.

“Na habit fakti që përfaqësuesi gjerman nuk i fsheh të preferuarit e tij dhe as armiqësinë ndaj Listës Serbe, e cila mbështetet nga Beogradi dhe përfaqëson interesat e popullit serb në Kosovë dhe Metohi”, u shpreh Petkoviq, sipas njoftimit.

Ai gjithashtu kritikoi mungesën e reagimit të diplomatit gjerman ndaj “provokimeve” me flamuj shqiptarë në qendër të Mitrovicës të Veriut gjatë festës së 17 Shkurtit dhe mbështetjen e hapur të Kurtit për protestat studentore në Beograd.

“Është e qartë se kush ishin favoritët e Rohdet në zgjedhjet e fundit, por serbët dhanë mesazhin e tyre përmes mbështetjes së Listës Serbe”, përfundoi Petkoviq.

Lista Serbe është rrugës që për herë të parë të humbë një ulëse nga 10 të garantuara për komunitetin serb në Kuvendin e Kosovës. Partia e Rashiqit, që shërbeu si ministër gjatë Qeveris Kurti, ka siguruar një mandat.