Festa e kurbanit ose fundjava e sakrificës siç njihet nga besimtarët myslimanë nuk ka kaluar “në paqe” për pushuesit në plazh.
Pamjet e siguruara nga Albanian Post dëshmojnë një skenë aspak të zakontë për një fundjavë plazhi.
Kanalizimet të cilat dergjen në det, kanë transportuar gjakun e bagëtive të cilat janë bërë kurban duke krijuar jo pak shqetësim te pushuesit, e sidomos ata më të vegjëlit.
Nga dëshmitë në terren cilësohet se kjo situatë ka krijuar jo pak tension mes familjarëve të cilët kanë larguar fëmijët nga bregu.
Vija e parë bregdetare është mbushur nga gjaku i cili po shkarkohet në det duke shkelur dhe një nga rregullat bazë të “hallallit”.
Këto të fundit, janë shumë strikte dhe synojnë të minimizojnë vuajtjet e kafshës.
Shumica e fshehin thikën që kafsha të mos e shohë atë.
Ai që vret kafshën duhet ta bëjë shpejt, me një prerje në fyt dhe ekziston gjithashtu një mënyrë e veçantë për të kulluar gjakun.
Festa është e lidhur me haxhin – pelegrinazhin në Mekë që është një nga pesë shtyllat e Islamit – dhe shënon gatishmërinë e Abrahamit për t’ia flijuar të birin Zotit.
Në disa vende, familja e dikujt që sapo ka bërë haxhin në Mekë i zhyt duart në gjak dhe dekoron muret e jashtme të shtëpisë me gjurmët e duarve të tyre.
Por traditat ndryshojnë shumë sipas rajonit.
Në Egjipt, disa fëmijë dhe të rritur zhytin duart në gjakun e kafshës së therur dhe vendosin gjurmët e duarve në shtëpi, biznese dhe madje edhe makina për t’u mbrojtur nga e keqja.
Shqipëria shkel jo vetëm rregullin e kurbanit por edhe të bashkëjetesës në komunitet. Ky është mësimi i parë i fesë.
