Presidenti i Kolumbisë akuzon SHBA-të për bombardim të një barke me shtetas kolumbianë në Karaibe

Presidenti i Kolumbisë, Gustavo Petro, ka akuzuar Shtetet e Bashkuara se kanë bombarduar një barkë me flamur kolumbian dhe me shtetas kolumbianë në bord, gjatë një operacioni të fundit ushtarak në Karaibe. Ai paralajmëroi për një “skenar të ri lufte” në rajon dhe kërkoi që vendet e Karaibeve të mblidhen urgjentisht për të diskutuar situatën.

Sipas autoriteteve amerikane, sulmet, të cilat nisën më 2 shtator, kanë synuar trafikantë droge në ujërat ndërkombëtare pranë Venezuelës dhe kanë shkaktuar vdekjen e të paktën 21 personave. Megjithatë, SHBA nuk ka publikuar prova për identitetin e personave të vrarë apo për natyrën e ngarkesës së mjeteve të goditura.

Presidenti Petro deklaroi se “nuk bëhet fjalë për një luftë kundër kontrabandës, por për një luftë për naftë” dhe se ky agresion përbën një kërcënim për të gjithë Amerikën Latine dhe Karaibet.

Shtëpia e Bardhë reagoi duke i cilësuar deklaratat e Petro-s si “të pabaza dhe të dënueshme”, dhe kërkoi nga ai të bëjë një tërheqje publike. SHBA theksoi gjithashtu se, ndonëse ka dallime politike me Kolumbinë, mbetet e përkushtuar ndaj bashkëpunimit rajonal për sigurinë dhe stabilitetin.

Ndërkohë, Senati amerikan rrëzoi një propozim që do të kërkonte nga Presidenti Donald Trump miratim të posaçëm nga Kongresi për kryerjen e këtyre sulmeve.

SHBA, sipas një dokumenti të rrjedhur kohët e fundit, e ka klasifikuar veten si të përfshirë në një “konflikt të armatosur jo ndërkombëtar”, çka i jep autoritet ligjor për të ndërmarrë operacione ushtarake kundër grupeve të shpallura si organizata terroriste, përfshirë kartelet e drogës në Amerikën Latine.