Prokuroria nuk autorizoi Policinë e Kosovës të kryejë bastisje për mbylljen e strukturave paralele

Prokuroria Themelore në Prishtinë ka njoftuar se nuk e ka autorizuar Policinë e Kosovës për të kryer kontrolle dhe bastisje në lokacionet ku u mbyllën struktura paralele serbe.

Ky institucion përmes një komunikate për media, ka theksuar se s’ka pasur kërkesë zyrtare me shkrim për kryerjen e këtij aksioni, sipas tyre s’ka pasur asnjë provë që të ngritën dyshime se po kryhen vepra panale të cilat bien nën kompetencën e PTHP-së.

“Nuk ka pasur ndonjë kërkesë zyrtare me shkrim për kryerjen e këtij aksioni nga ana e institucioneve gjegjëse, për çka edhe nuk është ofruar kurrfarë prove para prokurorit të shtetit për tu krijuar dyshimi i bazuar se është duke u kryer ndonjë vepër penale që bie nën kompetencën e Prokurorisë Themelore në Prishtinë”, thuhet në komunikatë.

Në njoftim theksohet se prokurori i shtetit duke pasur parasysh faktin që në këtë rast s’janë përfillur procedurat e nevojshme të përcaktuar në Kodin e Procedurës Penale, nuk ka mundur që në rastin konkret të lëshohet çfarëdo autorizimi.

“Prokurori i shtetit është i gatshëm dhe i përkushtuar në ndjekjen e veprave penale dhe kryerësve të tyre, gjithmonë duke u bazuar në legjislacionin në fuqi, si dhe duke u bazuar në parimin e barazisë dhe mos diskriminimit të gjithë qytetarëve të Republikës së Kosovës”.

Të mërkurën në orët e para të mëngjesit, Policia e Kosovës, ka zhvilluar një aksion ku janë mbyllur komunat paralele serbe në Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec, Skënderaj si dhe posta e zyre tatimore ilegale.

Gjatë vitit 2024, Policia e Kosovës në disa raste ka mbyllur institucione të strukturave paralele të Serbisë, të cilët funksionojnë me sistemin e Serbisë – ku fillimisht u mbyllën organet e përkohshme komunale të Dragashit, Suharekës, Prizrenit dhe Rahovecit.

Më pastaj u mbyllën organet e përkohshme komunale të Pejës, Istogut, Klinës, Skenderajt, si dhe ato në komunat në veri: Mitrovicë e Veriut, Zveçan, Zubin Potok dhe Leposaviq.

Ndërkohë u mbyllën edhe degët e Postës së Serbisë në Veri të Kosovës, kasaforta e Bankës Popullore të Serbisë në Leposaviq, e ashtuquajtura Zyra për Kosovën e Qeverisë së Serbisë, Drejtoria e Fondit për Sigurimin Pensional dhe Invalidor, Qarku Administrativ Kosovë-Mitrovicë dhe Qendra për Punë Sociale në Vushtrri.

Policia e Kosovës më 8 janar mbylli edhe Administratën Tatimore në Mitrovicën e Veriut, e cila funksiononte në kuadër të sistemit të Serbisë, për shkak të “aktiviteteve të paligjshme”, si dhe kompaninë e sigurimeve nga Serbia – Dunav Osiguranje, për shkak të dyshimeve se punonte pa licencë.