Ushtarë që po luftojnë për Ukrainën janë shfaqur duke qëlluar një të burgosur rus të luftës jashtë një fshati të Kievit në një video të publikuar, raportoi The Guardian të premten.
Pamjet fillimisht u shpërndanë në Telegram. Neë York Times më pas raportoi se e ka verifikuar videon dhe BBC-ja raportoi se ka konfirmuar lokacionin në veri të qytetit Dmytrivka dhe ka gjetur imazhe satelitore që tregonin trupa në tokë.
Në video, të paktën tre burra, përfshirë një me plagë në kokë dhe duart e lidhura pas shpinës, mund të shihen që shtrihen të vdekur afër një burri të katërt i cili frymon rëndë me një xhaketë që i mbulon kokën.
“Ai është ende gjallë. Filmojini këta grabitës. Shiko, ai është ende gjallë. Ai po gulçon”, dëgjohet të thotë një burrë në video rusisht.
Një ushtar më pas e qëllon atë në kokë dy herë. Ai vazhdon të lëvizë, kështu që ushtari e qëllon sërish dhe më pas ai ndalon. Ushtari dëgjohet më pas: “Lavdi Ukrainës”, dhe një tjetër që vazhdon: “Lavdi heronjve”.
Ushtarët e gjallë në video kanë të veshur ngjyrat ukrainase në krah, të kaltrën dhe të verdhën, kurse burrat në tokë kanë shami të bardha, ngjyra e trupave ruse.
Ministri i Jashtëm i Ukrainës, Dmytro Kuleba, ka thënë të enjten se ka dijeni për videon dhe se do ta hetojë.
