Putini nis hakmarrjen e brendshme për dështimin në Kursk

Presidenti rus, Vladimir Putin, ka marrë masa ndëshkuese ndaj zyrtarëve për reagim joadekuat ndaj inkursionit në zonën e Kurskut nga trupat ukrainase. Instituti Amerikan i Luftës ka thënë në raportin e fundit se Putin e ka ngritur në detyrë komandantin çeçen Apty Alaudinov dhe zëvendësministrin rus të Mbrojtjes, Yunus-Bek Yevkurov, derisa hoqi nga detyra ish-guvernatorin e Kurskut, Alexei Smirnov.

Sipas raportit, ky ndërrim pozicionesh është përpjekje për të goditur zyrtarët që s’arritën t’i përgjigjeshin si duhej ushtrisë ukrainase në Kursk të Rusisë.

“Autoritetet ruse arrestuan ish-zëvendësdrejtorin e Korporatës për Zhvillimin e Rajonit të Kurskut, Igor Grabin më 9 dhjetor, për keqmenaxhimin e fondeve të destinuara për fortifikimet mbrojtëse në rajon. Kremlini duket se po ndëshkon zyrtarët e qeverisë së rajonit të Kurskut, ndërsa po shpërblen zyrtarët ushtarakë rusë përgjegjës për forcat ruse në rajonin e Kurskut”, thuhet në raportin e Institutit të Luftës.

Në mënyrë të befasishme, ushtria e Volodymyr Zelenskyt ishte futur në zonën ruse të Kurskut, duke i shkaktuar shkatërrime masive.

Gjatë gushtit dhe shtatorit, Ukraina kishte shkatërruar urën e dytë në këtë rajon, duke ia vështirësuar situatën ushtrisë së Putinit. Si pasojë e kësaj, mediat perëndimore kishin raportuar se Rusia i kishte zhvendosur ushtarët koreanoveriorë në Kursk.