Situata në luginën Panjshir në veri të Kabulit, e vetmja zonë në Afganistan që nuk është ende nën kontrollin e talebanëve, mbetet e paqartë, ndërsa luftimet janë intensifikuar.
Mësohet se talebanët kanë kryer disa sulme, ku nga shkëmbimet e zjarreve, kanë vdekur qindra luftëtarë.
Shumë prej mediave afgane, kanë shpallur fitoren e talebanëve mbi luginën e “pamposhtur”, por një gjë e tillë është mohuar nga ana e gjeneralëve ushtarakë të kësaj zone.
“Ata u mposhtën dhe Panjshir është tashmë nën kontrollin tonë” – thotë një komandant taleban.
Por këto pretendime nuk janë konfirmuar ende zyrtarisht. Më herët, një zëdhënës i Forcave së Rezistencës Kombëtare në luginën Panjshir deklaroi të kundërtën.
Amrullah Saleh, një nga udhëheqësit e grupit rebel, ka shpërndarë një video për të vërtetuar se ai është ende në Luginën Panjshir.
“Nuk ka dyshim që jemi në një situatë të vështirë. Talebanët po mundohen të na pushtojnë. Shumë luftëtarë talebanë dhe shumë prej forcave tona kanë humbur jetën. Por unë i siguroj qytetarëve se ne nuk jemi larguar nga Afganistani. Nuk do dorëzohemi” – është shprehur Saleh.
Lugina Panjshir është e vetmja provincë që nuk ka rënë në duart e talebanëve, por ka pasur luftime të rënda të raportuara mes grupeve.
