Rreshterit të Policisë së Kosovës i digjet vetura, dyshohet për hakmarrje për shkak të detyrës

Munish Avdiu është rreshteri i Policisë së Kosovës në Vushtrri, vetura e të cilit është gjetur e përfshirë nga zjarri. Kështu kanë bërë të ditur burime të Gazetës Sinjali.

Sinjalizues të Gazetës Sinjali kanë bërë të ditur se vetura është në emër të djalit të rreshterit Avdiu. Ndërkaq dyshohet se djegia e veturës ka ardhur si hakmarrje për shkak të detyrës së rreshterit policor.

Për këtë rast, Gazeta Sinjali ka tentuar të marrë më shumë informacione por përkundër insistimit, zëdhënësi i Policisë në Mitrovicë, Avni Zahiti ka ridërguar informacionet që kanë qenë në raportin 24-orësh të Policisë së Kosovës.

“Sa i përket rastit në fjalë ju lutem i referohemi informacionit të dhënë në raportin 24 orësh. Zjarrëvënie/ Vushtrri: Viktima mashkull kosovar ka raportuar se vetura e tij e tipit private VW Golf VI është përfshi nga zjarri. Njësitë policore dhe zjarrfikësit kanë dalë në vendin e ngjarjes por zjarrin e kishin fikur familjarët e viktimës. Zjarri dyshohet se ishte shkaktuar qëllimisht nga ndonjë person i dyshuar pasi në vendin e ngjarjes janë gjetur dy shishe me lëndë djegëse që dyshohet të jetë benzinë. Në veturë janë shkaktuar dëme nga zjarri dhe ende nuk dihet motivi i rastit. Rasti vazhdon të hetohet”, thuhet në përgjigjen e Zahitit.

Gazeta Sinjali ka kontaktuar edhe me Avdiun, por ai nuk ka pranuar të japë më shumë informacione për këtë rast.