Qytetarët e Malit të Zi në zgjedhjet e sotme zgjodhën për president Jakov Milatoviçin, kandidatin për president të Lëvizjes Evropa Tani. Në raundin e dytë ai fitoi kundër kundërshtarit të tij, kreut të DPS-së, Milo Gjukanoviç. Sipas rezultateve preliminare, Milatoviç ka fituar rreth 60% të votave, ndërsa Gjukanoviç 40%. Në raundin e dytë Milatoviç u mbështet nga Fronti Demokratik, Demokratët e Malit të Zi, GP URA, Prava Mali i Zi, Mali i Zi i Bashkuar, Biram Mali i Zi.
Jakov Milatoviç i përket plejadës së politikanëve më të rinj malazezë, të cilët u vunë në qendër të vëmendjes së opinionit politik kur hyri në qeverinë e kryeministrit Zdravko Krivokapiç si ministër i Zhvillimit Ekonomik.
Pas votimit të mosbesimit ndaj asaj qeverie, Milatoviç së bashku me ish-ministrin e Financave dhe Mirëqenies Sociale, Milojko Spajiç, në qershor të vitit të kaluar themeluan Lëvizjen Evropa Tani (PES).
Ai ka lindur në Podgoricë më 07.12.1986. Është i martuar me Milenën dhe ka tre fëmijë, dy vajza Sara dhe Ana, dhe djalin David.
Në zgjedhjet lokale në Mal të Zi tetorin e kaluar, PES fitoi mbështetjen më të madhe në Podgoricë dhe njoftoi formimin e një qeverie me partitë fituese të zgjedhjeve parlamentare në gusht 2020, dhe Milatoviç shihej si kryetar i kryeqytetit.
PES e propozoi Milatoviçin për president të Malit të Zi pasi Komisioni Shtetëror Zgjedhor refuzoi kandidaturën e kolegut të tij partiak Spajiç dhe në raundin e parë zgjedhor fitoi 28.9% të votave dhe u kualifikua për në raundin e dytë.
Në raundin e dytë zgjedhor, ai u përball me kandidatin e DPS-së, Milo Gjukanoviç.
Shkollën fillore, të mesme dhe universitetin e kreu në Podgoricë.
Si bursist i qeverisë amerikane, ai kaloi një vit studimi në Universitetin Shtetëror të Illinois.
Pas kësaj ai studioi për një semestër në Universitetin e Ekonomisë dhe Biznesit në Vjenë (WU Wien), këtë herë si bursist i Qeverisë së Austrisë. Komisioni Evropian i mundësoi atij të kalonte një vit studimi në Universitetin e Romës (La Sapienza). Si bursist i qeverisë britanike, ai mori një diplomë master në ekonomi në Universitetin e Oksfordit.
Krahas arsimit formal, Milatoviç ka ndjekur edhe programet e organizuara nga Kombet e Bashkuara në Nju Jork, Fondacioni Gjerman Konrad Adenauer, Ambasada e Malit të Zi në Romë dhe Zyra për Bashkëpunim Ndërkombëtar të Fakultetit Ekonomik në Podgoricë.
Përveç kësaj, ai studio programin “Oxbridge Academic” në Oxford, dhe programe të shumta të Fondit Monetar Ndërkombëtar (FMN) në Londër, London School of Economics (LCE) dhe të tjerë.
Ai gjithashtu u trajnua në Universitetin e Pekinit, Akademinë e Lidershipit të Universitetit të Stanfordit dhe Universitetin e Beogradit.
Ai ka fituar çmime të shumta, flet anglisht, italisht dhe spanjisht.
Ka punuar në sektorin bankar brenda dhe jashtë vendit, ka qenë pjesë e ekipit të analizës ekonomike dhe politike në Bankën Evropiane për Rindërtim dhe Zhvillim (BERZH), është marrë me analizën ekonomike të rajonit të Evropës Juglindore dhe më pas analiza e vendeve të Ballkanit Perëndimor.
Nga viti 2018 deri në vitin 2020, ai punoi në Bukuresht si analist kryesor ekonomik i BERZH-it për Rumaninë, Kroacinë, Slloveninë dhe Bullgarinë.
