Rriten tensionet në Karaibe! SHBA sekuestron cisternën e naftës, Venezuela: Kjo është pirateri

Shtetet e Bashkuara kanë sekuestruar një cisternë të madhe nafte pranë brigjeve të Venezuelës, duke rritur presionin ndaj regjimit të Nicolás Maduros në një moment kur kriza politike në vend vazhdon të thellohet. Lajmin e bëri të ditur Presidenti Donald Trump, i cili e përshkroi anijen si “më të madhen e sekuestruar ndonjëherë”.

Sipas Prokurores së Përgjithshme Pam Bondi, cisterna, e quajtur Skipper, më parë e njohur si Adisa, ka qenë prej vitesh nën sanksione të SHBA-së për përfshirje në një rrjet të paligjshëm tregtimi nafte që ka mbështetur organizata të shpallura terroriste, përfshirë Hezbollahun dhe Korpusin e Gardës Revolucionare të Iranit, shkruan A2 CNN. Bondi publikoi pamje ku forcat amerikane zbritnin me litar nga një helikopter mbi kuvertën e anijes, gjatë një operacioni të përbashkët të FBI-së, Shërbimit të Hetimeve të Sigurisë dhe Rojës Bregdetare, me mbështetjen e Departamentit të Luftës.

Rriten tensionet në Karaibe! SHBA sekuestron cisternën e naftës,

Operacioni u zhvillua në ujërat ndërkombëtare pa incidente apo të lënduar, ndërsa anija po transportonte naftë bruto venezuelase drejt Kubës dhe më pas Azisë. Zyrtarë amerikanë thanë se mund të pasojnë sekuestrime të tjera në javët në vijim.

Venezuela reagoi ashpër, duke e cilësuar veprimin si “pirateri ndërkombëtare” dhe duke akuzuar SHBA-në se po synon pasuritë natyrore të Venezuelës. Qeveria njoftoi se do ta apelojë rastin në të gjitha organizatat ndërkombëtare.

Sipas të dhënave satelitore, Skipper kishte fshehur pozicionin real duke “manipuluar” transponderin e saj, një praktikë e njohur në transportet e dyshimta të naftës. Anija lundronte me flamur të Guajanës, megjithëse nuk ishte e regjistruar atje. Sekuestrimi ndodh në një kohë kur SHBA ka rritur praninë ushtarake në Karaibe dhe ka ndërmarrë goditje ndaj mjeteve të dyshuara për trafik droge.