Rriten tensionet ushtarake në Karaibe, SHBA-të dërgojnë një grup aeroplanmbajtës në Amerikën Latine

Shtetet e Bashkuara kanë nisur dislokimin e një grupi aeroplanmbajtës në Amerikën Latine, në kuadër të një lëvizjeje të re ushtarake që shihet si përshkallëzimi më i madh i pranisë amerikane në Detin e Karaibeve vitet e fundit.

Sekretari amerikan i Mbrojtjes, Pete Hegseth, ka urdhëruar dërgimin e aeroplanmbajtëses me energji bërthamore USS Gerald R. Ford, më e madhja dhe më e avancuara në flotën amerikane së bashku me njësinë e saj ajrore dhe disa anije luftarake që do të formojnë grupin goditës.

Sipas Pentagonit, qëllimi zyrtar i këtij dislokimi është lufta kundër trafikut të drogës, pas dhjetë sulmesh të ndërmarra nga SHBA-të që prej shtatorit ndaj mjeteve të dyshuara për trafik në Karaibe dhe në Paqësorin lindor, të cilat kanë shkaktuar 43 viktima. Megjithatë, analistët dhe vëzhguesit ndërkombëtarë e interpretojnë këtë veprim si presion të shtuar ndaj presidentit të Venezuelës, Nicolás Maduro, për ta detyruar të tërhiqet nga pushteti.

Administrata e presidentit Donald Trump ka zgjeruar akuzat edhe ndaj presidentit të Kolumbisë, Gustavo Petro, të cilin Trump e ka quajtur “tregtar të paligjshëm droge”. Të premten, Departamenti i Thesarit vendosi sanksione ndaj Petros dhe familjes së tij.

Zëdhënësi i Pentagonit, Sean Parnell, tha se qëllimi i grupit goditës është të “forcojë aftësinë e SHBA për të zbuluar, monitoruar dhe penguar aktivitetet e paligjshme që kërcënojnë sigurinë dhe stabilitetin e hemisferës perëndimore”.

Në një deklaratë të fortë, sekretari Hegseth paralajmëroi se çdo grup kriminal që trafikon drogë në rajon do të trajtohet “si Al-Qaeda”, duke shtuar se SHBA do të “gjurmojë, ndjekë dhe eliminojë” rrjetet e tilla.

Dislokimi i një aeroplanmbajtëse të këtij kalibri shihet si një sinjal i qartë për përgatitje të mundshme të operacioneve më të gjera ushtarake, përtej sulmeve detare të deritanishme. Trump ka deklaruar se operacionet mund të zgjerohet edhe në tokë, pa specifikuar se në cilat vende