Aksionet e Meta Platforms kanë pësuar rritje pasi gjigandi i mediave sociale, Facebook, u riemërua për të ndërtuar metaverse-in, mjedisin e përbashkët virtual.
Mark Zuckerberg, shefi ekzekutiv, ka treguar se emri i ri i korporatës, Meta, pasqyron punën e kompanisë të investuar në metaverse, në vend të shërbimit të saj të mediave sociale, i cili do të vazhdojë të quhet Facebook.
Agjencia e lajmeve, “Reuters”, shpjegon se ndryshimi vjen pas kritikave nga ligjvënësit dhe rregullatorët mbi fuqinë e tregut të kompanisë, vendimet algoritmike dhe policimin e abuzimeve në shërbimin e saj.
Nga ana tjetër, analistët kanë pritshmëri që platforma metaverse të krijojë një përvojë më të mirë për konsumatorët, duke përdorur teknologjinë e realitetit të shtuar dhe atë virtual nga zhvillimi i lojërave video te përdorimi i syzeve inteligjente.
Doug Anmuth, analisti i J.P.Morgan, ka thënë se teksa krijuesit e lojërave janë adoptues të hershëm të kësaj platforme, ka potencial që edhe të tjerë t’i bashkohen kësaj platforme.
“Ngjashëm me strategjinë e saj aktuale me FB Family, besojmë se kompania planifikon të paguajë tarifa minimale me kalimin e kohës për të maksimizuar ekonominë e krijuesit”, ka shtuar Anmuth.
Në tregtimin e herët pas zbulimit, Meta Platforms pësoi një rritje me një për qind në 319.95 dollarë, pasi fitoi afro 4.3 për qind një ditë më parë, të enjten e 28 tetorit.
