Sarrazin: Zero tolerancë për dhunën e retorikën nacionaliste të Serbisë

Emisari gjerman për Ballkanin Perëndimor, Manuel Sarrazin, ka thënë se ngjarjet e fundit në Kosovë tregojnë seriozitetin e situatës, derisa ka bërë thirrje të dyja palëve që të përmbahen nga dhuna e mëtejshme, për të mos e përkeqësuar situatën.

Ai tha se ka zero tolerancë për dhunën dhe retorikën nacionaliste që po vjen nga Serbia.

“Kam mirëkuptim të plotë për demonstratat paqësore, por zero tolerancë për dhunën dhe retorikën nacionaliste që kemi dëgjuar nga Serbia javët e fundit, si dhe sulme personale, shpifëse ndaj individëve që janë të papranueshme”, tha Sarrazin për Radio KIM, transmeton Gazeta Express.

Ai beson se largimi nga institucionet e Kosovës nuk është hapi i duhur për asnjë komunitet që dëshiron të ushtrojë të drejtat e veta kushtetuese.

“Është shumë e rëndësishme që komuniteti serb të përfitojë nga përfaqësimi që i garantohet këtij dhe komuniteteve të tjera pakicë në vend. Kjo është mënyra e vetme për t’u dëgjuar dhe për të mbrojtur interesin tuaj”, tha ai.

Ai përsëriti se Gjermania i mbështet plotësisht përpjekjet e përfaqësuesit të posaçëm të BE-së, Miroslav Lajçak dhe theksoi se as Kosova as Serbia “ende nuk i kanë zbatuar plotësisht obligimet e tyre nga dialogu”, si dhe se kthimi i menjëhershëm i serbëve të Kosovës në institucionet e Kosovës është i nevojshëm sepse është e nevojshme për të dalë nga kriza dhe retorika e ndarjes.

“Gjermania pret që Lista Serbe, si të gjitha partitë e tjera politike në Kosovë, të luajë një rol konstruktiv në formësimin e së ardhmes së Republikës multietnike të Kosovës”.

Ai tha se arritja e një marrëveshjeje më të gjerë do të jetë përfituese si për popullin e Kosovës ashtu edhe për Serbinë dhe do të sjellë stabilitet rajonal që mund të krijojë perspektiva të reja, duke përfshirë investime të reja dhe vende pune.