Politikania serbe Rada Trajkoviq, i ka thënë presidentit të Serbisë, Aleksandar Vuçiq, se kot tenton ta trembë.
Trajkoviq ka thënë se ajo është në anën e duhur dhe se serbët në Kosovë duhet t’i heqin qafe kriminelët.
“Më kot po përpiqesh të më trembësh Aleksandar Vuçiq. Më kot analistët e tu në Pink çdo ditë tentojnë të më portretizojnë para gjithë kombit. Më kot ju zgjoni edhe ‘të fjeturit’ brenda opozitës në përpjekje për të më diskredituar. Unë jam në anën e duhur. Serbët në Kosovë duhet të çlirohen nga kriminelët!” – ka shkruar Trajkoviq në Twitter.
Trajkoviq së fundi është emëruar këshilltare e ministrit të ri për Komunitete dhe Kthim në Qeverinë e Kosovës, Nenad Rashiq.
“Mendoj se qytetarët e kombësisë serbe kanë shumë arsye për t’u frikësuar. Para së gjithash, ata kanë një arsye sepse për herë të parë që nga ardhja e Vuçiqit në pushtet, ata vazhdimisht kanë frikë nga njerëzit e tyre. Sepse ata që janë në barrikada, i sjellin me forcë, i sjellin me urdhër, i kanë maskat, njerëzit që janë të armatosur fshehin identitetin e tyre, kontrollojnë funksionimin e komunitetit serb në disiplinimin e sjelljes së tyre”, tha ajo për N1.
Trajkoviq tha se janë serbët ata që bëjnë terrorin, të maskuar dhe të armatosur, e jo Policia e Kosovës.
