Rusia vazhdon ti referohet bombardimeve të NATO-s kundër Serbisë, për të sulmuar perëndimin dhe për ta rreshtuar veten si aleaten më besnike të Beogradit.
“Serbët nuk u thyen nga bombardimet, ata i treguan botës se si mbrohet dinjiteti kombëtar”, tha zëdhënësja e ministrisë së jashtme në Moskë, Maria Zakharova.
Në një konferencë, ajo deklaroi se krerët serbë nuk do të ndjekin shembullin e vendeve perëndimore dhe të harrojnë agresionin. Sipas saj ata janë të vendosur për të mos harruar krimet e luftës të kryera nga aleanca në vitin 1999.
“Ne e respektojmë këtë qëndrim dhe i mbështesim miqtë tanë serbë”, tha Zakharova. Sipas saj serbët ruajtën identitetin dhe vendin e tyre.
“25 vjet më parë, aviacioni i NATO-s i tregoi të gjithë botës se çfarë do të thotë në të vërtetë ndërhyrja humanitare”, ishin fjalët e zyrtares ruse e cila prezantoi një botim të ri mbi ngjarjen të titulluar “Jehona e gjatë e 1999’’. Në të, siç thotë, tregohet perceptimi i shoqërisë serbe për perëndimin.
