Serbia kërcënon: ROSU s’mund të shkojë në veri, nëse NATO nuk e ndal, këtë e bën populli serb

Serbia vazhdon të flasë për konflikt në veri “në ditët e ardhshme” dhe çdo patrullim të njësiteve speciale policore të Kosovës në atë zonë, apo siç e quan ajo me emrin e vjetër ROSU, ta quajë pushtim.

Kështu, drejtori i Zyrës për Kosovën në Qeverinë e Serbisë, Petar Petkoviq, të enjten mbrëma, ka thënë se në rast se njësitet policore të Kosovës shkojnë në veri, atëherë sipas tij, NATO është e obliguar t’i ndalë ato. E në rast se NATO nuk e bën këtë, ai ka kërcënuar se “do ta bëjë populli serb”.

“Kam vetëm një mesazh për Kurtin – NATO është e detyruar të parandalojë çdo përpjekje të ROSU për të pushtuar veriun! Nëse nuk e bën, inkursionet e ROSU do të parandalohen nga populli serb! Për të qenë plotësisht i qartë – po flasim për një kërcënim të drejtpërdrejtë të dhunës, forcës dhe konflikteve që Kurti po bën për të pushtuar veriun e Kosovës dhe Metohisë, pas të cilit ka vite që është fiksuar”, ka thënë Petkoviq, përcjell Zyra që drejton.

Ndërmjetësues nga BE-ja dhe SHBA-ja kanë qëndruar të mërkurën e të enjten në Kosovë, ndërkohë tash janë në Beograd. Ata kanë bërë thirrje që të shmangen tensionet dhe barrikadat, ato që zakonisht i vënë banorët serbë në veri sa herë janë të pakënaqur me vendimet e Qeverisë së Kosovës.

Qeveria e Kosovës ka paralajmëruar se më 1 shtator do të futet në fuqi reciprociteti me Serbinë për letërnjoftimet.