Serbia është krenare që nuk është pjesë e “histerisë antiruse”.
Kështu i tha zëvendëskryeministri Aleksandër Vulin, ministrit të Punëve të Jashtme në Moskë, Sergei Lavrov, gjatë një takimi të zhvilluar me të në Rusi. Vulin, prorus i deklaruar dhe i sanksionuar nga SHBA, siguroi aleatin e tij se Beogradi nuk do të bëhet pjesë e sanksioneve kundër Kremlinit.
Në një njoftim të qeverisë serbe thuhet se të dy zyrtarët u pajtuan se bashkëpunimi dypalësh ndërmjet Serbisë dhe Rusisë është shumë i mirë dhe se po zhvillohet në të gjitha nivelet, para së gjithash falë marrëdhënieve miqësore dhe të përzemërta mes Presidentit serb Aleksandar Vuçiç dhe atij rus Vladimir Putin.
Zv/kryeministri Vulin “i shprehu gjithashtu mirënjohjen Rusisë dhe ministrit Lavrov, siç thuhet, për qëndrimin parimor për integritetin territorial dhe sovranitetin e Serbisë dhe për mbështetjen e tyre vetëmohuese në luftën e popullit serb kundër rezolutës për Srebrenicën.
Vizita e zëvendëskryeministrit serb Vulin në Rusi është e dyta që kur ai u emërua në këtë post në pranverën e këtij viti.
