Shawn Mendes vjen për herë të parë në Kosovë

Sunny Hill Festival nis me rikthimin e Dua Lipës në qytetin e saj për të hapur festivalin si pjesë e turneut të albumit “Radical Optimism” në Prishtinë.

Pas saj, në skenën C4 do të performojë legjenda e muzikës elektronike, Fatboy Slim, fitues i 6 çmimeve MTV Video Music Awards, i cili do të mbajë energjinë deri në orët e para të mëngjesit.

Më 2 gusht, për herë të parë në Kosovë vjen ylli botëror Shawn Mendes, fitues i MTV Europe Music Awards, me performanca të mbushura me publik në arena si “O2” në Londër dhe “Madison Square Garden” në New York.

Shawn Mendes është i njohur edhe për stilin e tij të pastër, tekstet personale dhe lidhjen e fortë me fansat. Për shumë të rinj në mbarë botën, ai është bërë simbol i ndjeshmërisë dhe autenticitetit në skenën pop.

Në të njëjtën natë në C4 do të kënaqë publikun DJ brazilian Mochakk, i njohur me stilin e tij funky dhe i renditur në Top 100 DJ-të më të mirë në botë.

Natën e fundit, skena kryesore do t’i takojë projektit audiovisual të Matteo Millerit, Anyma, që kombinon muzikën elektronike me artin vizual. Në C4, festivali mbyllet me performancën e Peggy Gou, DJ dhe producentja e hitit “(It Goes Like) Nanana”.

Festivali sjell edhe artistë të tjerë si Artsssassin, Bookie, Deezy, Sainté, Sienna Spiro, Skream, Sugar Rush, Tommy Gold, TSHA dhe duetet energjike si Mygal B2B Edgar Kerri.

Në listën e emrave të mëdhenj janë edhe Loredana, Lyrical Son, MC Kresha, Era Istrefi, Tayna, Kida, Ledri Vula dhe shumë të tjerë.