SHBA dhe Perëndimi, të bashkuar para bisedimeve Blinken-Lavrov për krizën në Ukrainë

Shtetet e Bashkuara dhe aleatët e saj perëndimorë kanë thënë se do të jenë bashkë për t’iu përgjigjur fuqishëm çdo inkursioni rus në Ukrainë, përpara bisedimeve midis Washingtonit dhe diplomatëve të lartë të Moskës mbi krizën.

Sekretari amerikan i Shtetit, Antony Blinken, tha të enjten se çdo “akt i ri agresioni” nga Moska ndaj fqinjit të saj do të përballet me një “përgjigje të shpejtë, të ashpër dhe të përbashkët” nga Shtëpia e Bardhë dhe partnerët e saj, njofton Klan Kosova.

Këto deklarata të Blinken erdhën pas bisedimeve në Berlin me zyrtarë nga i ashtuquajturi grup transatlantik katërkëndor – i përbërë nga SHBA-ja, Gjermania, Franca dhe Mbretëria e Bashkuar – si pjesë e një turneu diplomatik në Evropë që synon të gjejë një mënyrë për të zbutur tensionet me Kremlinin.

Të premten ai do të takohet me ministrin e Jashtëm rus, Sergej Lavrov, në Gjenevë, i cili pritet të bëjë presion për plotësimin e listës gjithëpërfshirëse të kërkesave të sigurisë së Rusisë për të garantuar paqen.

Duke parë këto bisedime, aleatët evropianë të Washingtonit theksuan gjithashtu të enjten se ata mbetën në linjë me SHBA-në pas komenteve të presidentit Joe Biden, të mërkurën, që sugjeruan se mund të ketë ndarje midis liderëve perëndimorë mbi mënyrën se si të reagojnë në rast të një sulmi.